Софија – Бугарскиот министер за надворешни работи Кристијан Вигенин потенцира дека неговата земја ја поддржува изградба на „Јужен поток“, кој е во интерес на сите членки на ЕУ и државите низ кои оди трасата на гасоводот. Вигенин нагласи дека „Јужен поток“ гарантира поголема безбедност за набавката на гас и притоа додаде дека Бугарија воедно сака да ја премости големата зависност од руски гас. Тој додаде дека Бугарија е внимателна во соработката со Русија околу гасоводот „Јужен поток“, како и дека пристапува целосно и внимателно.
Нови Сад – Првата индонезиска фабрика во Европа ќе биде изградена во Инџија, во која ќе бидат инвестираат 11 милиони евра, пишува новосадски „Дневник“. Индонезискиот инвеститор „Индофуд“ ќе постави камен темелник за изградба на фабриката следниот месец, а во првата фаза на реализацијата на проектот ќе инвестира околу 11 милиони евра. Фабриката треба да почне да работи кон крајот на годината.
Белград – Швајцарско-српската стопанска комора ќе работи на јакнење на економските односи на двете земји, најавено е во Белград на претставувањето на оваа стопанска асоцијација. Комората е регистрирана во март 2014 година, а првиот состанок ќе се одржи во јуни. Еден од основачите на Швајцарско-српската стопанска комора, регионалниот директор на компанијата „Нестле адриатик“, Ансгар Борнеман, рече дека тоа здружение на стопанственици ќе пружи поддршка за одржливиот развој на Србија и ќе биде глас на стопанствениците.
Белград – Црниот пазар на тутун од октомври 2012 година, од буџетот на Србија „однесе“ 200 милиони евра, што е еднакво на инвестицијата во мостот Земун-Борча, тврди директорот за корпоративни работи и комуникации на компанијата ЈТИ за Западен Балкан, Горан Пекез, предупредувајќи дека цаквата трговија со тутун го намалува прометот на тутунската индустрија, која како што вели во последните 10 години во Србија инвестирала над 1,2 милијарди евра. Тутунската индустрија во Србија вработува директно 1,700, а индиректно уште 70.000 луѓе во малопродажбата, дистрибуцијата и на работи на одгледување на тутун.
Подгорица – Котор со минимална потрошувачка кошница во март од 926,35 евра и натаму е најскап град во Црна Гора. Според податоците на статистичката агенција Монстат, минималната потрошувачка кошница во Црна Гора во март изнесувала 797,90 евра. Со просечна плата од околу 480 евра, може да се покријат само 60,57 отсто на минималните трошоци на четиричлено семејство во Црна Гора, односно 51,81 отсто трошоци во Котор.
Загреб – Стапката на невработеност во Хрватска за март оваа година изнесуваше 22,3 отсто, објави хрватскиот Државен завод за статистика. Под влијание на сезонските движења, невработеноста е помала за 0,4 процентни поени во однос на февруари. Како што се наведува во соопштението на Заводот, се работи за стапка на регистрирана невработеност, која се пресметува како однос меѓу бројот на невработени и вкупното активно население, така февруарската стапка од 22,7 отсто воедно била највисока во последните 12 години, т.е. од мај 2002 година.
Загреб – Просечната месечна исплатена нето плата во Хрватска за февруари оваа година изнесуваше 5.427 куни (712 евра). Како што покажуваат првите податоци кои ги објави хрватскиот Државен завод за статистика, таа е за 126 куни или номинално за околу 2,3 отсто помала од просечната нето плата во јануари оваа година, кога изнесувала 5.553 куни. Просечната нето плата за февруари оваа година е нешто помала и на годишно ниво, во однос на февруари 2013 година, за 20 куни или 0,3 отсто.
Дубровник – Вкупно 21 компанија кои работат во регионот потпишаа повелба за соработка со која се обврзуваат дека во следниот период ќе вработуваат млади. Повелбата е потпишана во Дубровник на Меѓународната конференција „ХТ Бизнис Арена 2014“, која по 12-ти пат ја организира „Инфоарена“. – Најголемите компании ја прифатија оваа иницијатива и дадоа ветување дека во следните три години ќе работат на тоа со заеднички сили, низ заеднички програми за вработување и едукација, рече по потпишувањето програмската директорка на Конференцијата и сопственичка на компанијата „Тагорас“, Кармен Мајетиќ-Павиќ.
Виена – Мексиканскиот милијардер Карлос Слим, по маратонските преговори со австриската Влада, постигна договор за преземање на ефективна контрола над „Телеком Австрија“. По потпишување на акционерскиот договор со австрискиот државен холдинг „Оел АГ“, со кој двата партнери заедно стекнаа мнозински удел во „Телеком Австрија“, компанијата на Слим „Америка Мобајл“, соопшти дека за купување на преостанатиот удел во австриската компанија ќе понуди 7,15 евра по акција.
Прага – Унгарската енергетслка компанија МОЛ од италијанската ЕНИ ќе преземе 124 бензински станици во Чешка, пишува чешкиот дневен весник „Хосподарске новини“, повикувајќи се на неименувани извори. Според весникот, за наведените бензински станици МОЛ нема да плати во готово, туку ќе ги замени за својата рафинерија во италијанскиот град Мантова, како и за уште некои бензински станици во Италија. Благодарение на тој договор, МОЛ ќе има 273 бензински станици во Чешка, со што ќе стане втор најголем петрохемиски ланец на чешкиот пазар.
Москва – „Газпром“ на „Нафтогаз Украина“ и предаде сметка за непреземен гас за 2013 година од 11,38 милијарди долари, соопшти заменик-директорот на „Газпром“ Александар Медведев. Според условите на договорот, „Нафтогаз“ лани требаше да преземе 41,6 милијарди кубни метри руски гас, а презел само 12,9 милијарди кубни метри. – Долгот за 2012 година изнесува 7,1 милијарда долари, а за 2013 – 11,4 милијарди долари, прецизираше Медведев.
Купертино – Нето профитот на „Епл“ во вториот квартал на тековната фискална година, што лани почна во октомври, е зголемен за седум отсто на годишно ниво и достигна 10,22 милијарди долари. Компанијата соопшти дека приходите во периодот јануари-март 2014 достигнале 45,65 милијарди долари, што е за 4,7 отсто повеќе од вториот квартал во минатата фискална година. Обемот на продажбата на смартфонот „Ајфон“ пораснал за 17 отсто на 43,7 милиони парчиња.
Хавана – Американската агенција „Мудис“ го намали кредитниот рејтинг на Куба за еден степен, наведувајќи ја како причина за тоа, преголемата зависност на карипскиот остров од евтина нафта од Венецуела. „Мудис“ како ризик ја наведува и опасноста од нагла и бурна политичка транзиција на Куба. Со тој потег рејтингот на Куба е намален на оценка Цаа2 од Цаа1, односно уште подлабоко во неинвестициско ниво, со стабилна прогноза на рејтингот.
Коментари