Атина – Грција заработи 1,3 милијарди евра со продажба на шестмесечни држави записи, пред влезот на пазарот на долгорочни обврзници од кој е исклучена веќе 4 години. Каматните стапки на шестмесечните обврзници паднаа на 3,01 од 3,6 отсто од претходната слична аукција одржана во март, наведе Агенцијата за управување со јавниот долг.
Атина – Грчкиот извоз во февруари е намален петти месец по ред, покажаа податоците на Заводот за статистика во Атина. Во следните месеци се очекуваат слични резултати, бидејќи извозот веќе чувствува последици од неодамнешниот развој на настаните во Русија и Украина, пишува грчкиот весник „Катимерини“. Истовремено, увозот е во пораст, што може да биде знак за економско зајакнување, но во комбинација со падот на извозот го спречува намалувањето на надворешно-трговскиот дефицит.
Белград – Директорот на Унијата на работодавци на Србија Драгољуб Рајиќ смета дека 30.000 работници годишно од јавниот сектор можат да се префрлат во приватниот. На прашањето колку во овој момент е реално вишокот на вработени од јавниот сектор да се префрли во приватниот и колку сега би можеле да се вработат кај приватници, Рајиќ вели дека потенцијал во реалниот сектор има, но дека ништо не може да се прецизира додека не се донесе таква програма.
Белград – Во следните 10 дена треба да се постигне договор, а потоа и да се потпише концесионен договор за големите инфраструктурни, пред се патни проекти. Тоа го најави лидерот на Српската напредна партија, Александар Вучиќ, по состанокот со лидерот на Социјалистичката партија на Србија Ивица Дачиќ. – Тоа е начин задолжувањата да се решат со големи инфраструктурни проекти, рече Вучиќ, наведувајќи дека инсистира на тоа сите работи да бидат готови во следните четири години.
Подгорица – Рускиот бизнисмен Олег Дерипаска побара од црногорскиот премиер Мило Ѓукановиќ веднаш да се запре процесот за продажба на имотот на „Комбинатот за алуминиум – Подгорица“ (КАП). Дерипаска бара и сегашниот тричлен Одбор на доверители да се замени со петчлен, со што неговата фирма би имала мнозинство. Дерипаска бара црногорската Влада да обезбеди во стечајната постапка за КАП да се почитуваат меѓународните стандарди и домашните закони, да се раскине соработката со државната „Монтенегро бонус“, која управува со компанијата и на најголемите доверители да им се овозможи пристап до оперативните активности во подгоричката фабрика.
Подгорица – Црна Гора лани имала покриеност на извозот со увозот од само 21,2 отсто, што е дури и раст во однос на претходната година кога изнесуваше 20,1 отсто. Вкупната надворешно-трговска размена на Црна Гора лани изнесувала 2,15 милијарди евра, што е пад од 1,8 отсто во однос на претходната година, соопштено е од статистичката агенција Монстат. Истовремено, извезена е стока во вредност од 375,6 милиони евра, што е за 2,4 отсто повеќе, а увезена е за 1,773 милиони евра или за 2,6 отсто помалку во однос на 2012 година.
Загреб – Управата на унгарската „Мол“ најави можност за гаснење на една рафинерија на хрватската нафтена компанија „Ина“, која инаку се наоѓа во нивна сопственост. Можноста за гаснење на една од рафинериите на „Ина“ постои, со оглед на падот на побарувачката за нафтени преработки и непрофитабилноста на рафинериското работење, сметаат дел од нафтените експерти, додека други сметаат дека рафинериите на „Ина“ можат да бида попрофитабилни со модернизација и враќање на традиционалните пазари во Хрватска и соседните земји.
Берлин – Индустриското производство во Германија во февруари порасна за 0,4 отсто, соопшти германското Министерство за економија. Забележаниот раст ги надмина предвидувањата на експертите кои очекуваа раст од 0,3 отсто. Индустриските порачки се поголеми, а економистите оценуваат дека германската економија ја врати силата по разочарувачкиот почеток на четвртиот квартал во 2013 година.
Берлин – Германскиот министер за финансии Волфганг Шојбле предупреди дека кризата во Украина може да ги загрози обидите на Берлин идната година да го усогласи буџетот. Шојбле за германскиот весник „Билд“ рече дека не може да гарантира дека германската државна потрошувачка нема да ги надмине буџетските приходи идната година, како што прогнозираше во март. – Никој не знае како ќе се одвиваат работите во Украина, наведе министерот, додавајќи дека сепак постојат добри шанси буџетот да се усогласи и дека Владата ќе направи се што е во нејзина моќ тоа да го оствари.
Вашингтон – Најавата дека Русија ќе купи 500.000 барели нафта од Иран, предизвика загриженост во Белата куќа, поради можно загрозување на договорот за иранската нуклеарна програма. Рускиот економски дневник „Комерсант“ информира дека Русија планира купување на 500.000 барели иранска нафта дневно, со што би била надмината извозната граница поставена со преодниот договор за иранскиот нуклеарен потенцијал, што Техеран го постигна со светските сили кон крајот на минатата година.
Токио/Канбера – Јапонија и Австралија постигнаа трговски договор за намалување на царините на увоз на клучни производи, јави британскиот јавен сервис Би-Би-Си. Јапонија се согласи да ги намали царините на австралиското говедско месо и да ги зголеми квотите за безцарински увоз на сирење, најголемиот австралиски млечен извозен производ во Јапонија, додека Австралија ќе ги намали царините на увоз на јапонска електроника, автомобили и бела техника.
Коментари