„Amazon“ влегува во бизнисот со Онлајн ТВ и видео игри. Компанијата ја претстави новата услуга „Fire TV“.
Со купувањето на малиот уред корисниците ќе можат да гледаат видеа од популарни услуги како „Prime Instant Video“, „Hulu Plus“, „Netflix“ и други. Покрај тоа, „Fire TV“ ќе нуди пристап до музика, фотографии и дури видео игри, велат од компанијата на Џеф Безос.
„Fire TV“ располага со моќен хардвер со 4-јадрен процесор на „Qualcomm“, 2GB меморија, двојна „WiFi“ антена и друго. Според „Amazon“ благодарение на сето ова „Fire TV“ ќе вчитува содржината и ќе ги обработува игрите побрзо и квалитетно од конкурентите како „Apple TV“, „Chromecast“, „Roku 3“.
Цената на уредот е 99 долари, како дополнително може да биде купен и контролорот за управување со игрите, ако корисникот сака да го користи уредот и за тоа. Тој чини 40 долари. Покрај тоа, имателот на Fire TV ќе треба да плаќа и претплати за услугите кои сака да ужива, на пример „Prime Instant Video“, „Netflix“, „Vevo“ и други.
Уредот на „Amazon“ располага и со можност за претплата на музички сервиси како „Pandora“, „Amazon MP3“, „iHeartRadio“ и други. Се разбира, постои можност за синхронизација со таблет или смартфон и слушање на музика од уредот или гледање на слики од него. На располагање ќе е и опција за слушање музика преку „Amazon Cloud Player“.
Фановите на видео игрите, пак, ќе можат да купат игри за околу 2 долари за една или да се претплатат за неограничен пристап. Ќе се нудат наслови од „ЕА“, „Disney“, „Gameloft“, „Mojang“, „2K“, „Amazon Game Studios“ и други.
Уредот ќе располага и со функција за гласовно пребарување по актер, режисер, жанр, апликација, игра, итн. Резултатите ќе ги покажат достапните понуди за купување на дадената содржина и повеќе информации за неа.
Засега „Fire TV“ ќе се продава само во САД, но „Amazon“ има планови да започне продажба на уредот во целиот свет, но засега не е познато кога ќе се случи тоа.
