Бугарија и Грција треба да се обединат за да се справат со конкуренцијата во земјоделството што доаѓа од земјите соседи Македонија и Турција, повика бугарскиот ресорен министер Мирослав Најденов.
Според Најденов, кој викендот го посети саемот „Зоотехна“ во Солун, Македонија и Турција се уште не се членки на ЕУ поради што не се задолжени да ги спроведуваат европските закони, а воедно уживаат и привилегии во однос на агросекторот што ги немаат земјоделците во Унијата.
– Соседи сме со Грција и нашата амбиција е да овозможиме поголема заедничка размена, нагласи Најденов.
На долгоорочен план, додаде, освен зголемувањето на конкурентноста, голем предизвик се и климатските промени особено ако се земе предвид дека во регионот веќе е евидентен недостигот од вода.
Најденов повика на интензивирање на трговската размена меѓу Бугарија и Грција преку поголем извоз на бугарски жита во Грција, а поголем увоз на грчко овошје и зеленчук.
