Американскиот ланец ресторани за брза храна „McDonald’s“ во февруари забележа пад на продажбата од 1,4 проценти на американскиот пазар, поради неповолните временски услови.
Најголемиот светски ланец за брза храна и во јануари поради екстремно ладната зима забележа слаби резултати, пренесува агенцијата АП.
Компанијата наведува дека глобалната продажба во рестораните, отворени најмалку 13 месеци, е намалена за 0,3 проценти, што би можело лошо да влијае на резултатите од првиот квартал. Во регионот на Блискиот Исток, Африка и Азија и Пацификот, продажбата е намалена за 2,6 проценти, пред се поради лошите резултати во Јапонија и Австралија, како и поради прославата на Кинеската нова година.
Светла точка за оваа американска компанија беше Европа, каде продажбата пораснала за 0,6 проценти, благодарение на добрите резултати во Британија и Франција, без оглед на падот на продажбата во Германија.