Ширум светот се испорачани 77 милиони таблети во последниот квартал од 2013-та година, што е раст од 28 проценти во однос на 60-те милиони од истиот период од 2012-та година, покажуваат истражувањата на компанијата „IDC“.
Слично како и во случајот со смартфоните и покрај растот во испораката, „Apple“ забележа пад во својот удел. Компанијата вкупно испорачала 26 милиони примероци на „iPad“, што е раст од 13 проценти во однос на една година претходно, но значително помалку од просекот на целиот пазар на таблети. „Apple“ на тој начин го зазема водечкото место на пазарот со скоро 34 проценти удел, но ова истовремено е пад во однос на 38.2 проценти колку што имаа во 2012-та година.
Од друга страна, „Samsung“ расте многу бргу. Компанијата во последниот квартал од 2013-та испорачала 14.5 милиони таблети, што е за дури 86 проценти повеќе отколку од пред една година. Истовремено, уделот на „Samsung“ на глобалниот пазар е зголемен од 13 на скоро 19 проценти.
На табелата следат „Amazon“ со 5.8, „Asus“ со 3.9 и „Lenovo“ со 3.4 проценти удел на пазарот. Аналитичарите посебно истакнуваат дека „Lenovo“ ќе има раст во испораката од дури 325 проценти на годишно ниво.
