Елза Скиапарели се смета за една од најголемите ривали на познатата Коко Шанел, како и за една од најдобрите фигури во својата модна ера…
Италијанската модна дизајнерка повторно е во центарот на вниманието поради една од своите креации, која сега е продадена на аукција и тоа по цена од 180.000 долари. Аукциската куќа „Kerry Taylor“ од Лондон ја продаде „Zodiac“ јакната од оваа креаторка, од нејзината „Astrology“ зимска колекција од 1938/39.
Украсена од страна на основачите на „Maison Lesage“, Алберт и Мари-Луис Лесаж, оваа прекрасна тегет плишана јакна ни ја претставува харизмата на целиот универзум со декорации како што се ѕвездите, планетите и сите 12 хороскопски знаци. Ускрасена е со златни нитни и перли во облик на злато, а претставени се и ѕвезди што паѓаат и комети. На рабовите има прекрасни каменчиња кои се посипани со стакленца за да имаат прекрасен сјај.
Без сомнение ова е една од нејзините најубави колекции. Марлен Дитрих ја носела оваа креација во една прилика при фото сесија во својата резиденција во 1938 година. Дизајнерката била инспирирана од ноќното небо, кое како малечка го гледала преку телескопот на вујко и. Фантастичните детали и кројки, како и неверојатната моментална состојба на оваа јакна ја прават една од најубавите и најважните парчиња од колекциите на Елза Скиапарели.
