„Microsoft“ ги зголемува своите напори во развојот на паметни додатоци. Компанијата има формирано голем тим од експерти на чие чело е Алекс Кипман, еден од креаторите на „Kinect“.
Една од целите на тимот е развивање и модифицирање на верзија на „Windows“, која ќе се користи во паметните додатоци. Меѓу тест-уредите се рачен часовник, очила со додадена реалност и други слични уреди. Кипман и неговиот тим ги развиваат и „Kinect Glasses“, а нивната идеа е тие да се претворат во вистински производ.
Пред неколку недели Џули Ларсон-Грин, која го предводи одделот за уреди и хардвер на „Microsoft“, навести дека „Microsoft“ е заинтересиран за слични уреди и очекуваат голема иднина во сензорите. Таа објави дека софтверскиот гигант се фокусира на развој на т.н. „природен кориснички интерфејс“ и дека подолго време работат на тоа.
Самиот Кипман во моментов не ги коментира овие информации. Компанијата не брза со овој тип на уреди и засега нема информации дали некој од нив ќе се појави на пазарот во блиска иднина.