По скокот на еврото во однос на американската и јапонската валута, министерот за економија на Франција, Пјер Московиси, оцени дека од некои аспекти еврото е премногу силно.
Според неговите зборови, вредноста на еврото ќе има лошо влијание на францускиот извоз.
Европската валута во петокот достигна вредност од 1,3711 долари, што е највисоко ниво од средината на ноември 2011 година.
Еврото се зголеми во однос на јапонскиот јен, достигнувајќи курс од 126,97, што е највисоко ниво од април 2010 година.
Скокот на еврото го обновува оптимизмот во поглед на економските перспективи во еврозоната, но за француската влада, ова зголемување е загрижувачко, особено за извозот.
Францускиот министер за индустриски развој, Арно Монтебург, исто така, изрази загриженост во врска со зајакнување на еврото, велејќи дека ќе има негативни ефекти врз европската економија, а не само на француската.
Тој наведе дека порастот на еврото за само 10 центи, претставува една милијарда евра помала продажба за ЕАДС, најголемата европска воздухопловна корпорација.
