Американската вселенска агенција НАСА успешно го тестираше својот нов суперсоничен авион, достигнувајќи брзина малку под границата на звукот.
Моделот, наречен X-59, се развива со цел да се реши проблемот со моќниот „звучен бум“, кој со децении е главна пречка за комерцијални суперсонични летови над населени места.
Тест летот се одржа на 14 април над пустината Мохаве во Калифорнија, а деталите дури сега станаа достапни за јавноста. Авионот достигна максимална брзина од 0,98 мах (околу 1.210 км/ч), што е само малку помалку од брзината на звукот.
За време на летот, леталото изврши серија маневри додека се креваше на поголеми височини и се приближуваше со суперсонична брзина. Пилотот успешно изврши серија маневри, вклучувајќи вртења лево и десно.
НАСА моментално ги анализира податоците од овој лет како дел од работата на технологија што драстично би го замолчила звучниот бум. Успехот на оваа технологија би овозможил воведување на нова класа на оперативни суперсонични авиони.
Авионот X-59, конструиран од „Локид Мартин“, е долг 30 метри со распон на крилјата од девет метри. Карактеристичниот нос на авионот сочинува речиси една третина од неговата вкупна должина; инженерите истакнуваат дека токму овој дизајн е клучен за потиснување на звучните удари што се јавуваат при пробивање на звучната бариера.
Патем, X-59 го изврши својот прв лет на 28 октомври 2025 година, кога се движеше со релативно мала брзина од 370 км/ч на максимална висина од 3,6 километри.
