Откако ја отстрани „Bluetooth“ функционалноста на „S Pen“ со минатогодишниот „Galaxy S25 Ultra“, некои корисници шпекулираа дека „Samsung“ постепено би можел да се откаже од своето препознатливо пенкало.
Сепак, откако „Galaxy S26 Ultra“ беше претставен со „S Pen“, тие претпоставки пропаднаа, а „Samsung“ сега потврди дека не се откажува.
Имено, во интервју за „Bloomberg,“ Вон-Џун Чои, главен оперативен директор на „Samsung“ за „Mobile Experience“, изјави дека компанијата работи на нова генерација на „S Pen“.
„Работиме на понапредна технологија во рамките на ‘S Pen’ за да развиеме нова структура на екранот и да ги намалиме компромисите предизвикани од интеграцијата на ‘S Pen’. Пенкалото ќе продолжи да биде една од клучните технологии“, рече Чои.
Дополнително, Чои потврди дека „Samsung“ сè уште не донел одлука дали ќе има наследник на „Galaxy S25 Edge“ и „Galaxy Z TriFold“. Сепак, тој не ја исклучи можноста за поширока верзија на „Galaxy Z Fold“ што би требало директно да се натпреварува со идниот „iPhone Fold“ на „Apple“.
