Гените што ги наследувате играат поголема улога во одредувањето на тоа колку долго ќе живеете отколку што се мислеше претходно, сугерира една нова студија.
Претходните истражувања сугерираа дека генетиката игра помеѓу шест и 33 проценти од тоа колку долго ќе живее една личност, но новото истражување објавено во списанието Science ја зголемува таа бројка на 55 проценти.
„Животниот век несомнено е обликуван од многу фактори, вклучувајќи го начинот на живот, гените и, што е важно, случајноста. Земете ги, на пример, генетски идентичните организми одгледувани во слични услови кои умираат во различно време“, вели Бен Шенхар, главен автор на студијата од Институтот за наука Вајцман во Израел.
„Во нашата работа, се обидовме да утврдиме колку од варијациите меѓу различните луѓе може да се припишат на генетиката. Нашата студија се обиде да ги оддели факторите на долговечност на генетика и „сè друго“. Тоа „сè друго“ сочинува околу 50 проценти од вкупното влијание“, вели Шенхар.
Истражувачите анализираа историски податоци од студии за близнаци и открија дека фактори како што се смртните случаи предизвикани од насилство, несреќи и заразни болести не беа земени во предвид.
Причината за смртта не беше наведена, туку само возраста на смртта. Значи, ако едниот близнак починал на 90 години од природни причини, а другиот на 30 години од заразна болест, ова би можело да даде погрешен впечаток за улогата на наследните особини во долговечноста.
Истражувачите ја повторија анализата, земајќи го предвид фактот дека ранливоста на инфекции и паѓања се зголемува со стареењето на луѓето. Резултатите сепак покажаа дека генетскиот состав придонесува за околу 50 проценти во очекуваниот животен век.
„Бројката до која дојдовме не беше извлечена од никаде“, изјави Шенхар, кој ја проучува физиката на стареењето, за NBC News.
„Ако ги погледнете студиите за близнаци на речиси сè кај луѓето, ќе ги добиете тие 50 проценти. Ако ја погледнете наследноста на возраста во менопаузата, што е процес поврзан со стареењето, таа е исто така околу 50 проценти“, рече Шенхар.
Тој, исто така, посочи на стогодишниците.
„Овие луѓе не стигнуваат едвај до 100 години. Не, тие имаат заштитни гени кои ги штитат од штетните ефекти на стареењето“, заклучи Шенхар.
