Вообичаените конзерванси што се користат за зачувување на храната и продолжување на нејзиниот рок на траење може да бидат поврзани со поголем ризик од неколку видови рак и дијабетес тип 2, според две нови студии од Франција.
„Ова се многу важни резултати за конзервансите што се користат широко не само на францускиот и европскиот пазар, туку и во Соединетите Американски Држави“, изјави Матилд Тувие, главен истражувач на студијата NutriNet-Sante што беше користена во истражувањето, објави CNN.
Студијата за ракот, објавена во списанието „BMJ“, следела 105.000 луѓе 14 години и ги испитувала ефектите на 58 конзерванси.
Анализата покажа дека шест конзерванси, вклучувајќи натриум нитрит, калиум нитрат, сорбати, калиум метабисулфит, ацетати и оцетна киселина, може да бидат поврзани со зголемен ризик од рак.
Натриум нитритот, кој се користи во преработеното месо, е поврзан со 32 проценти зголемен ризик од рак на простата, додека калиум нитратот е поврзан со 22 проценти зголемен ризик од рак на дојка и 13 проценти зголемен ризик од сите видови рак.
Студијата за дијабетес тип 2, објавена во списанието Nature Communications, следела речиси 109.000 учесници без дијабетес на почетокот.
Дванаесет од 17-те тестирани конзерванси биле поврзани со до 50 проценти поголем ризик од развој на дијабетес тип 2 кај луѓе кои консумирале најголеми количини.
Меѓу нив биле калиум сорбат, калиум метабисулфит, натриум нитрит, оцетна киселина и натриум ацетат.
Авторите предупредуваат дека ова се првите студии што ја испитуваат врската помеѓу конзервансите за храна и ризикот од рак и дијабетес тип 2, и дека се потребни дополнителни истражувања за да се потврдат резултатите.
„Овие податоци ја поддржуваат потребата од преиспитување на прописите што ја регулираат употребата на адитиви за храна за подобрување на заштитата на потрошувачите“, рече Анаис Хазенболер, главен автор на студијата.
