„Samsung“ постигна одлични продажни резултати со „Galaxy Z Fold7“ благодарение на неговиот потенок и полесен дизајн, но следната генерација на преклопниот телефон „Galaxy Z Fold8“ носи уште поголеми промени.
Според информациите објавени од јужнокорејскиот „DealSite“, „Galaxy Z Fold8“ ќе биде еден од најважните телефони на „Samsung“ во 2026-та година, со три големи подобрувања.
Три клучни промени што ќе го одбележат „Galaxy Z Fold8“
Прво, компанијата планира да го врати „S Pen“ пенкалото, кое отсуствуваше од моделот „Fold7“. Новата верзија треба да понуди уште подобро чувство за пишување и цртање, со поголема прецизност и интеграција со системските алатки.
Второ, „Fold8“ ќе користи нова технологија на метална конструкција наречена „ласерски дупчена плоча“, слична на онаа што наводно се користи на преклопниот „iPhone“. Оваа технологија треба драстично да ја намали видливоста на свиокот на екранот, што е еден од главните недостатоци на преклопните телефони.
Трето, батеријата конечно ќе добие значително подобрување од 4400 mAh на над 5000 mAh, што ќе го реши проблемот со слабиот век на траење на батеријата од претходните генерации.
Пазарот на преклопни телефони станува сè поконкурентен: покрај „Fold“ на „Samsung“, тука се и серијата „Vivo X Fold“, „Google Pixel 10 Pro Fold“ со функции на „Gemini AI“ и серијата „Motorola Razr 60“ за помали модели. Сепак, ако „Apple“ го одложи лансирањето на својот преклопен „iPhone“ до 2026-та година, „Samsung“ би можел дополнително да ја консолидира својата лидерска позиција во овој сегмент.
