Авиокомпанијата „Emirates“ од Дубаи нарача 50 дополнителни авиони „Airbus A380“ и на тој начин ќе го зголеми бројот на авиони во својата флота на 140, соопшти „Airbus“.
Претседателот на тој холдинг, шеикот Ахмед бин Саед ал Мактум, изјави дека А380 сеуште е водечкиот авион на „Emirates“, кој со оваа нарачка потврди дека на блискоисточниот пазар постои изразена потреба за многу големи авиони.
Нарачката е потпишана на аеромитингот во Дубаи, а на церемонијата за потпишување присуствуваа шеикот Ал Мактум и претставниците на „Emirates“ и „Airbus“.
„Популарноста на авионот А280 расте и тој модел стана водечкиот модел во нашата флота, пет години по неговото воведување. Тој денес е најефикасниот авион кога станува збор за потрошувачката на гориво и емисијата на штетни гасови“, изјави шеикот Ал Мактум.
Тој додаде дека „Emirates“ со најновата нарачка ќе ја прошири својата флота и старите авиони ќе ги замени со нови.