Во првите 24 часа од пуштањето во продажба, компанијата „Sony“ во САД продала преку милиони примероци од конзолата „PlayStation 4“.
Електронскиот гигант продажбата на „PS4“ ја започна на 15-ти ноември во САД и Канада. Тоа воедно се и првите земји во кои љубителите на видео-игри можеа да уживаат во новата генерација на популарната конзола.
„Ние сме многу среќни од реакцијата на потрошувачите, која засега е феноменална. Продажбата е многу добра во Северна Америка, а истото го очекуваме кога „PlayStation 4“ ќе пристигне во Европа и Јужна Америка на 29-ти ноември“, изјави директорот и претседател на „Sony“, Ендрју Хаус.
Интересно е тоа дека „PS“ конзолата овој пат во Јапонија ќе пристигне дури во февруари, многу подоцна од САД и Европа. Само за споредба, конзолата „PS3“ е лансирана практично во истовреме и во САД и во Јапонија, додека првата верзија на „Play Station“ прво беше претставена во Јапонија, а неколку месеци подоцна и во САД.
Компанијата „Microsoft“, која својата нова конзола „Xbox One“ ќе започне да ја продава од 22-ри ноември, неодамна упати и официјални честитки кон ривалот „Sony“.
