Американскиот технолошки гигант „Apple“ денес објави дека потпишал нов повеќегодишен договор вреден 500 милиони долари (431 милион евра) со компанијата „MP Materials“, единствениот целосно интегриран производител на ретки земни елементи во Соединетите Американски Држави.
Со тоа, Apple, како што е наведено во соопштението објавено на веб-страницата на американскиот гигант, се обврза да купи магнети од ретки земни елементи произведени во САД, кои беа развиени во водечката фабрика на MP Materials во Форт Ворт, Тексас.
Двете компании, исто така, ќе соработуваат за воспоставување најсовремена линија за рециклирање на ретки метали во Маунтин Пас, Калифорнија, како и за развој на нови магнетни материјали и иновативни технологии за обработка за подобрување на перформансите на магнетите.
Обврската е дел од ветувањето на Apple да потроши повеќе од 500 милијарди долари во САД во текот на следните четири години и се темели на долгата историја на компанијата во инвестирање во американски иновации, напредно производство и технологии за рециклирање од следната генерација.
„Американските иновации се двигател на сè што правиме во Apple и горди сме што ги продлабочуваме нашите инвестиции во американската економија“, рече извршниот директор на Apple, Тим Кук.
Тој нагласи дека ретките земни материјали се неопходни за производство на напредна технологија и дека ова партнерство ќе помогне во зајакнувањето на снабдувањето со витални материјали во Соединетите Американски Држави.
„Исклучително сме возбудени за иднината на американското производство и ќе продолжиме да инвестираме во генијалноста, креативноста и иновативниот дух на американскиот народ“, истакна Кук.
„Apple“ и „MP Materials“ ќе изградат најсовремен објект во Тексас со голем број производствени линии за неодимиумски магнети специјално дизајнирани за производите на „Apple“.
Новата опрема и техничките капацитети ќе ѝ овозможат на „MP Materials“ значително да го зголеми своето вкупно производство. По изградбата, магнетите произведени во Америка ќе бидат испорачани низ целата земја и низ целиот свет, помагајќи да се задоволи растечката глобална побарувачка за овој материјал, соопшти Apple.
Зголеменото производство ќе поддржи десетици нови работни места во напредното производство и истражувањето и развојот, а двете компании ќе обезбедат обемна обука за развој на работната сила, градејќи сосема нова рамка на американски талент и експертиза во производството на магнети.
