Земјите од БРИКС повторно не успеаја да постигнат значителен напредок во системот на прекугранични плаќања за трговија и инвестиции за кој дискутираат веќе една деценија.
Во соопштението издадено на почетокот на нивниот состанок во Бразил во неделата, лидерите на групата се обврзаа на понатамошни разговори за потенцијалот за поголема трговска интеграција, објави „Bloomberg“.
„Им наложуваме на нашите министри за финансии и гувернери на централните банки, по потреба, да продолжат со дискусиите за Иницијативата за прекугранични плаќања на БРИКС“, се вели во соопштението. Студија подготвена од централната банка на Бразил ќе биде презентирана на дводневниот самит во Рио де Жанеиро.
И покрај аспирациите на групата, напредокот е бавен, а бранот на глобалната трговија се менува толку брзо што можеби е невозможно да се стигне.
Тоа е пропуштена можност за БРИКС, бидејќи американскиот долар е под постојан притисок од непредвидливите политики на американскиот претседател Доналд Трамп. Американскиот долар го имаше најлошиот почеток на годината од 1973-та година, бидејќи трговската војна на Трамп и нападите врз неподготвеноста на Федералните резерви да ги намалат каматните стапки ги потресоа пазарите. Тоа ја доведе во прашање долгогодишната доминација на американските средства и ги поттикна инвеститорите да бараат алтернативи.
Ситуацијата е благодет за пазарите во развој, а аналитичарите очекуваат дека ќе трае.
Иако сите членки на БРИКС ја поддржуваат идејата за прекугранични плаќања, првпат спомената во изјавата на самитот на блокот во 2015-та година, техничките аспекти на интеграцијата се сложени. Системите на централните банки во некои земји сè уште не се подготвени, изјавија за агенцијата три лица запознаени со разговорите.
Дискусиите вклучуваат механизми за плаќање, видови валути што се користат, како да се распореди инфраструктурата и како да се споделат трошоците. Постојат безбедносни загрижености во врска со интегрираните системи, изјавија за агенцијата уште два извори. Проширувањето на блокот, исто така, предизвика одложувања.
Фактот дека неколку од валутите на блокот се неконвертибилни и постојните санкции против земјите-членки Иран и Русија дополнително ја комплицираат ситуацијата, рече изворот. Некои земји, исто така, веруваат дека трошоците за создавање и одржување на единствен систем не би биле оправдани со оглед на она што веќе го имаат во однос на билатералната трговија.
На пример, Кина го искористи хаосот во Соединетите Американски Држави за да започне масовна кампања за промовирање на глобалната улога на јуанот. Во говорот минатиот месец, гувернерот на централната банка на Кина, Пан Гонгшенг, истакна визија во која финансиските пазари на земјата се поотворени, а јуанот игра централна улога во глобалните текови на капитал.
Пекинг ја истражува можноста за лансирање на првите фјучерси за јуан во земјата, кои би можеле да се натпреваруваат со слични инструменти за хеџирање на офшор пазарите како што се Сингапур и Чикаго. Кина, исто така, го проширува својот систем за плаќање, познат како „CIPS“, за да вклучи повеќе странски банки.
Лидерите на БРИКС, исто така, ја потврдија својата посветеност на проширување на финансирањето во локална валута, диверзификација на изворите на финансирање и зајакнување на трговската соработка за промовирање на инклузивен раст и одржлив развој.
Документ до кој дојде „Bloomberg“ ги прикажува најновите идеи на блокот и покажува дека дискусиите околу новата инвестициска платформа наречена „NIP“ се исто така во застој.
Платформата се смета за потенцијално средство за пополнување на празнината во финансирањето на развојот, обезбедувајќи поголема флексибилност и намалувајќи ја зависноста од финансирање во цврста валута. Сепак, со оглед на различните пристапи и предлози, како и сложената природа на вклучените прашања, техничкиот дијалог ќе биде важен за да се постигне заедничко разбирање за потенцијалната додадена вредност и оперативната рамка на платформата, се вели во документот.
Трамп се закани дека ќе воведе 100% царини за членовите на БРИКС доколку го напуштат доларот во билатералната трговија. Отпорот, пак, го стимулира интересот за развој на локални системи за плаќање и други алатки што можат да ја олеснат трговијата и инвестициите меѓу земјите.
Идејата за напуштање на доларот и создавање заедничка валута за блокот не е предмет на дискусија, велат извори на „Bloomberg“. Одговорот на американскиот лидер не ги забави разговорите на БРИКС за интегрираните системи, изјавија за агенцијата три други извори.
Во изјавата на БРИКС, исто така, се споменува уште еден предизвик што го претставуваат „флуктуациите во финансиските и монетарните политики во некои напредни економии“ за земјите од блокот, кои веќе се борат со високи нивоа на долг.
„Високите каматни стапки и построгите услови за финансирање ги влошуваат ранливостите на долгот во многу земји“, се вели во документот.
