Уделот на Кина во увозот на САД падна на 7,1% во мај, што е најниско ниво од 2001-ва година, според податоците објавени од Бирото за попис на САД и цитирани од „Bloomberg“.
Тоа е за 4,3 процентни поени пониско од истиот период минатата година и е дел од долгорочен пад што започна за време на првиот мандат на претседателот Доналд Трамп. Уделот на Кина во увозот на САД беше највисок во септември 2024-та година од 14,8%, пред Трамп да се врати на функцијата и да воведе нови високи царини за увоз од земјата.
Меѓу земјите што имаа најголема корист од прегрупирањето се азиските соседи на Кина. Тајван и Виетнам учествуваа со речиси 6% во увозот на стоки во САД во мај, во споредба со околу 3% во 2023-та година.
Тајван сега е 1,2 процентни поени зад уделот на Кина во увозот во САД, делумно благодарение на зголемената побарувачка за полупроводници за вештачка интелигенција, индустрија во која земјата доминира.
Растечкиот удел на Виетнам во увозот е поттикнат од повторниот увоз од Кина и стоките произведени локално со кинески компоненти. Порано оваа недела, САД воведоа царина од 40% за таквите стоки.
