Цените на гасот во Европа пораснаа денес откако американскиот напад врз Иран предизвика стравувања од затворање на Ормутскиот теснец.
На референтната холандска дигитална берза TTF, мегават-час гас со датум на испорака во јули изнесуваше 42,44 евра на отворањето на берзата во понеделник, што е највисока цена од почетокот на април.
Во текот на утрото, цената се стабилизираше и мегават-час гас изнесуваше 41,23 евра пред пладне, приближно исто како и во петокот на крајот од тргувањето. Највисокото ниво оваа година го достигна на 10 февруари, од 56,94 евра.
Инвеститорите беа вознемирени на почетокот на неделата од американскиот напад врз подземните нуклеарни постројки во Иран. САД нападнаа нуклеарни постројки во Исфахан, Натанц и Фордоу во ноќта од сабота кон недела, со образложение дека сакаат да спречат развој на нуклеарно оружје.
Иран постојано нагласува дека неговата нуклеарна програма е исклучиво цивилна по природа. Вашингтон активно учествуваше во војната меѓу Иран и Израел со бомбардирање на ирански објекти пред нешто повеќе од една недела.
Инвеститорите стравуваат дека Иран ќе одговори на нападите со блокирање на Ормутскиот теснец, низ кој минуваат една третина од светската нафта и околу една петтина од течниот гас на пат кон клиентите низ целиот свет, според Ворен Патерсон од ИНГ банка.
