Американскиот претседател Доналд Трамп сериозно ја разгледува можноста за американски воен напад врз подземниот нуклеарен комплекс Фордо во Иран, изјавија извори блиски до администрацијата за Си-Би-Ес њуз.
Фордо се смета за најзаштитениот дел од нуклеарната програма на Иран, а Трамп верува дека неговото уништување е клучно за спречување на производство на нуклеарно оружје.
„Тој не чувствува дека има многу избор. Завршувањето на работата значи уништување на Форд“, изјави еден извор за Си-Би-Ес њуз.
Иако некои американски медиуми тврдат дека Трамп веќе ги одобрил плановите за нападот, тој сè уште не ја донел конечната одлука. Во очекување на можна дипломатска иницијатива од Техеран, тој одлучи да почека уште две недели, откри портпаролката на Белата куќа, Каролин Ливит.
Трамп ја разгледува опцијата Иран самиот да го онеспособи Фордоу преку преговори. Дипломатски контакти се очекуваат во наредните денови – британскиот министер за надворешни работи Дејвид Лами ќе се сретне во Вашингтон со американскиот државен секретар Марко Рубио, додека преговорите меѓу министрите за надворешни работи на Германија, Франција и Велика Британија со нивниот ирански колега Абас Арагчи се закажани за петок во Женева.
На Трамп му беа презентирани разузнавачки информации што укажуваат дека Иран е многу блиску до производство на нуклеарно оружје, но според конгресни извори, сè уште нема докази дека врховниот лидер ајатолахот Али Хамнеи дал наредба за изградба на боева глава.
„Во моментов нема индикации дека Иран го започнал процесот на милитаризација на својата нуклеарна програма“, изјави сенаторот Марк Ворнер, водечкиот демократ во Комитетот за разузнавање на Сенатот.
Трамп наводно разговарал и за логистиката на користењето на таканаречените бомби за разбивање бункери што би можеле да уништат подземни објекти како Фордо. Сè уште не е познато дали американската војска распоредила доволно ресурси во регионот за таков напад или колку време би било потребно за целосна оперативна подготвеност.
Според проценките на американските разузнавачки служби, Иран во меѓувреме подготвил ракети и друга опрема за можни напади врз американските бази на Блискиот Исток, во случај САД да се приклучат на воената кампања на Израел.
Трамп рече дека сака да донесува одлуки „во последната секунда“ бидејќи ситуациите во војната се менуваат брзо. „Можеби ќе нападнеме, можеби не. Никој не знае што ќе правам“, им рече тој на новинарите.
На платформата Truth Social, тој предупреди дека неговото „трпение е при крај“, истакнувајќи дека САД знаат каде е врховниот лидер Хамнеи, но додаде: „Нема да го убиеме – барем не засега“.
