Договорот меѓу Доналд Трамп и Кир Стармер беше финализиран на маргините на состанокот на Г7. Договорени се преференцијални тарифи, но прашањето за челикот и алуминиумот останува отворено.
Американскиот претседател Доналд Трамп во понеделник потпиша договор за официјално намалување на некои царини за увоз од Велика Британија, додека двете земји продолжуваат да работат на сеопфатен трговски договор. Договорот, објавен од Трамп и британскиот премиер Кир Стармер на маргините на самитот на Г7 во Канада, ги потврди квотите и царините за британските автомобили и ги укина царините за британскиот воздухопловен сектор, додека прашањето за челикот и алуминиумот останува нерешено, објави Ројтерс.
„Односите со Велика Британија се фантастични“, рече Трамп, додавајќи дека потпишале договор со Велика Британија.
Стармер го нарече „многу добар ден за двете наши земји, вистински знак на сила“.
Според извршна наредба од Белата куќа, САД имаат намера да воспостават квота за увоз на челик и алуминиум од Обединетото Кралство што би била ослободена од царините од 25 проценти, но под услов Велика Британија да ја докаже безбедноста на своите синџири на снабдување и постројки за производство на челик. Нивото на квотата ќе го одреди министерот за трговија Хауард Лутник.
Велика Британија досега избегна царини до 50 проценти за челик и алуминиум што САД им ги наметна на други земји претходно овој месец, но би можела да се соочи со зголемени царини од 9 јули доколку не се постигне договор за намалување на царините. Двајцата лидери потврдија план да им се даде на британските производители на автомобили годишна квота од 100.000 автомобили што можат да се испратат во Соединетите Држави со царина од 10 проценти, што е помалку од 25-те проценти што ги плаќаат другите земји.
Планот ќе стапи на сила седум дена по објавувањето во Федералниот регистар, соопшти Белата куќа. Договорот, исто така, ги отстранува царините за британската воздухопловна индустрија, вклучувајќи ги деловите и авионите. Велика Британија е првата земја што постигна договор за пониски царини со Трамп. САД ги намалуваат царините за увоз на британски автомобили, алуминиум и челик, додека Велика Британија вети дека ќе ги намали царините за американско говедско месо и етанол. Сепак, спроведувањето на договорот е одложено додека не се разработат деталите, а некои прашања остануваат отворени.
Велика Британија го нарече договорот голема победа за нејзиниот воздухопловен и автомобилски сектор, истакнувајќи дека е единствената земја што обезбедила таков договор со Вашингтон.
-Трговските договори обично стапуваат во сила за неколку месеци, а првите договори ги постигнуваме во рок од неколку недели. И нема да застанеме тука – изјави британскиот министер за трговија, Џонатан Рејнолдс.
Рејнолдс рече дека двете страни се согласиле за реципрочен пристап за 13.000 метрички тони говедско месо, нагласувајќи дека увозот од САД ќе мора да ги исполни строгите британски стандарди за безбедност на храната.
Двете земји остануваат фокусирани на обезбедување „значајно корисни резултати“ за фармацевтскиот сектор на Велика Британија, а работата за заштита на индустријата од потенцијални дополнителни тарифи ќе продолжи како дел од истрагите по Член 232 од страна на Министерството за трговија на САД.
-Велика Британија е многу добро заштитена. Дали знаеш зошто? Затоа што ги сакам. Тоа е нивна крајна заштита – одговори Трамп кога беше прашан дали договорот ќе го заштити Обединетото Кралство од идните царински закани.
