Наместо да понесе убави спомени од македонската метропола, еден турист од Швајцарија ќе го памети Скопје по непријатна епизода – скапо платена измама и груб третман од страна на таксист.
Случајот се случил вечерта на 14 јуни, кога странскиот патник, 43-годишниот Б.Ф.П.Х. од Швајцарија, пријавил во полиција дека бил излажан и злоупотребен од страна на такси возач кој му наплатил астрономски 7.800 денари за релативно кратка релација – од Центарот на Скопје до Средно Водно.
„Се преземаат сите мерки за расветлување на случајот. Во координација со инспекциските служби, ќе се провери и дали возилото било регистрирано како легален такси-превозник“, велат од МВР.
Според податоци од неколку скопски такси здруженија, просечна цена за возење од Центар до Средно Водно, дури и во вечерни часови, не би требало да надминува 250 денари. Сè над оваа сума се смета за злоупотреба на довербата на патниците – особено странците кои не се упатени во локалните тарифи.
„Со вакви постапки, се руши угледот на сите нас што чесно си ја работиме професијата. Овие поединци не се таксисти – тие се измамници зад волан“, коментираше Игор, таксист од Скопје.
Овој случај отвора ново поглавје во старата приказна за нерегулираните и слабо контролирани такси услуги во Скопје. И покрај повремените акции на градските власти и инспекциските органи, сè уште има возачи кои работат надвор од законот – без лиценца, без таксиметар, со нереални цени и често со заканувачко однесување.
„Ако сакаме да развиваме туризам, мора да понудиме и безбедност и фер третман. Не може турист да плати 120 евра за неколку километри. Тоа е срамота за сите нас“, реагираше Лидија, туристички водич и долгогодишен активист во областа на гостопримството.
Граѓаните, пак, реагираат со бес и разочараност. На социјалните мрежи се појавија бројни коментари со слични искуства, некои и од домашни патници, кои тврдат дека станува збор за организиран облик на измама од страна на мали групи таканаречени „диви возачи“.
И додека институциите ветуваат акција, јавноста со право се прашува: до кога ваквите поединци ќе им ставаат црна дамка на угледот на градот и на државата?
Б.З.М.
