Кога станува збор за инвестирање во недвижности, прашањето „куќа со базен или две гарсоњери?“ станува сѐ почеста дилема меѓу инвеститорите, особено во услови на турбулентен пазар.
Обете опции звучат привлечно, но носат различни можности за приход, одржување и профитабилност. За некого, базенот е луксуз што носи гости со подлабок џеб.
За друг, гарсоњерата е стабилен и сигурен извор на рента.
Атрактивноста на куќата со базен
Куќите со базен последниве години добиваат на популарност, особено кај краткорочните изнајмувања преку платформи како Airbnb.
Во летните месеци, ваквите објекти се резервираат со месеци однапред, особено ако се блиску до туристичка дестинација.
„Имам куќа со базен во околината на Охрид. Само со изнајмување во јули и август, ја покривам половина од годишните трошоци. Остатокот е чист приход“, вели Александар, сопственик на ваков објект. „Мал е бројот на луѓе што нудат приватен базен, па побарувачката е секогаш голема“.
Сепак, зад луксузот стојат и обврски – одржување на базенот, сметки, чистење, поголеми даноци и евентуални ремонти.
Осигурувањето и комуналиите се повисоки, а повратот на инвестицијата може да биде побавен ако нема постојан проток на гости.
Сигурноста на гарсоњерите
На другата страна на вагата се двете гарсоњери – опција која, иако помалку гламурозна, е далеку посигурна кога станува збор за долгорочна инвестиција.
Во Скопје, гарсоњерите се барани од студенти, самци и млади парови, а рентата се движи од 200 до 300 евра месечно.
„Гарсоњерите се мојата зона на комфор. Немам проблем со резервации, немам сезонски падови, а закупците остануваат по 2-3 години. За мене, тоа е мирна глава“, објаснува инвеститорката Ирена Андонова, која моментално поседува три вакви станови во Центар и во Аеродром.
Иако првичната заработка може да изгледа послаба во споредба со профитот од куќата со базен, гарсоњерите овозможуваат стабилен приход без големи осцилации и трошоци.
Што вели математиката?
Ако земеме пример – куќа со базен од 250.000 евра на добра локација може да донесе околу 15.000-20.000 евра годишно од краткорочно изнајмување.
Од друга страна, две гарсоњери по 100.000 евра (вкупно 200.000) можат да донесат околу 6.000-7.000 евра годишно, по стан, односно 12.000-14.000 евра за двете – но без сезонски ризик и без дополнителни вложувања за базен, мебел и одржување.
„Ако сакате флексибилност, можност да користите имотот за себе и потенцијално повисок профит, тогаш куќата со базен е за вас. Но, ако барате стабилен пасивен приход и ниско ниво на ризик, тогаш две гарсоњери се подобар избор“, вели Марко Николов, експерт за недвижнини.
Во крајна линија, не постои „победник“ – само одлука што треба да се темели врз личните цели, буџет, локација и способност за управување со имотот. А за тие што сакаат и сигурност и авантура – можеби е време да размислат за комбинација: една гарсоњера и една помала куќа со базен.
Б.З.М.
