Претставници на Обединетото Кралство и Европската Унија ќе се сретнат денес во Лондон за да разговараат за продлабочување на билатералните врски. Ова ќе се случи како дел од првиот официјален самит меѓу нив по Брегзит.
Разговорите меѓу премиерот Кир Стармер и раководителите на европските институции Урсула фон дер Лајен и Антонио Кошта имаат за цел да го отворат патот за нов договор меѓу Лондон и Брисел.
Постојат надежи дека доколку се постигне таков договор, тоа ќе ја подобри состојбата на британската економија, која сериозно страдаше од падот на трговијата со ЕУ, предизвикан од нејзините растечки трошоци и зголемените бирократски пречки поради излегувањето на Велика Британија од Европската унија во 2020-та година.
Откако ја презеде функцијата во јули минатата година, Стармер бара нов почеток во односите со ЕУ по годините на тензии по референдумот за Брегзит одржан на 23-ти јуни 2016-та година.
Сегашниот облик на односите по Брегзит во голема мера е определен од трговскиот договор постигнат од британскиот премиер Борис Џонсон. Стармер верува дека тоа може да се гради врз основа на зајакнување на трговијата и зајакнување на безбедноста.
Сè уште не е јасно што ќе биде објавено на состанокот, но вчера Стармер изјави дека ќе има договор, откако Лондон склучи договори со Индија и САД во последните недели.
„Утре ќе направиме уште еден чекор напред, со уште поголеми придобивки за Велика Британија, како резултат на зајакнувањето на соработката со ЕУ“, рече тој, додавајќи: „Придобивките од ова ќе се почувствуваат на пазарот на трудот, на сметките за нашите домаќинства и на нашите граници“.
Откако Лабуристичката партија се врати на власт по 14 години владеење на Конзервативците, време обележано во голема мера од организацијата и последиците од референдумот за Брегзит, двете страни се обидоа да ги ублажат односите.
Ова е најочигледно во координираните акции во поддршка на Украина по промената на надворешната политика на Вашингтон под водство на претседателот Доналд Трамп.
Стармер, кој водеше кампања за останување на Велика Британија во ЕУ за време на референдумот и повика на втор референдум потоа, рече дека сака нов договор со блокот од 27 земји што ќе ја олесни трговијата и ќе доведе до зголемена безбедносна соработка, вклучително и во купувањето воена опрема.
Иако нема царински давачки меѓу Кралството и Унијата, постојат голем број нетарифни бариери за трговија меѓу нив, како што се долготрајните гранични проверки и повеќе административна документација, што ја отежнува трговијата.
Визните ограничувања воведени по Брегзит, исто така, ја попречуваат билатералната размена, вклучително и во експертските области како што се банкарството и правото, како и во културата и образованието.
