Бил Гејтс ќе го донира речиси целото преостанато богатство на Фондацијата Гејтс, која ќе престане со работа во 2045 година, многу порано од претходно планираното. Според сегашните проценки, имотот вреди околу 107 милијарди долари, пренесува „Асошиејтед Прес“.
Донацијата се смета за една од најголемите филантропски иницијативи во историјата. Само ветувањето на Ворен Бафет, инвеститорот од „Беркшир Хатавеј“, кој има намера да го донира целото свое богатство, проценето на 160 милијарди долари, би можело да ја надмине донацијата на Гејтс, во зависност од движењето на берзата.
Средствата на Гејтс ќе се донираат постепено, што ќе ѝ овозможи на фондацијата да потроши дополнителни 200 милијарди долари во текот на следните две децении.
„Возбудливо е да имаме толку многу ресурси што можеме да ги насочиме кон овие цели“, рече Бил Гејтс.
Тој верува дека инвестирањето на неговото богатство ќе ги спаси и подобри животите на многумина, и дека ефектите од ова ќе траат дури и откако фондацијата ќе престане да работи. Фондацијата е на чело на глобалните филантропски организации со години. Основана од Бил и Мелинда Френч Гејтс во 2000 година, оттогаш потроши повеќе од 100 милијарди долари за научни истражувања, развој на нови технологии и долгорочни партнерства со земји и приватниот сектор.
Игра клучна улога во обликувањето на глобалната здравствена политика, особено во соработка со фармацевтските компании, за намалување на трошоците за лекување и обезбедување пристап до лекови за земјите со ниски и средни приходи.
Кога станува збор за критики или теории на заговор, Гејтс истакнува дека, како и секој поединец, тој има право да одлучи како ќе ги троши своите пари и сака да ги насочи кон намалување на смртноста кај децата.
-Дали е тоа лошо? Не е ли тоа достојна цел? Луѓето можат да критикуваат, но ние ќе продолжиме да се држиме до нашата работа за глобалното здравје, рече тој.
Првичниот план беше фондацијата да се затвори 20 години по смртта на Гејтс, но ова соопштение значително го забрзува тој план. Гејтс, кој денес има 69 години, планира да остане активно вклучен, иако вели дека можеби повеќе нема да го има последниот збор.
