Индиската војска изврши воздушни напади врз девет локации во Пакистан како одговор на терористичкиот напад во Кашмир за кој се обвинуваат радикални исламистички групи. Во тие напади, најмалку 26 лица беа убиени, додека 46 беа повредени, соопшти пакистанската армија. Од друга страна, индиските власти потврдија дека најмалку десет цивили се убиени, а 32 лица се повредени во пакистанското гранатирање долж линијата на контрола.
Да потсетиме дека Индија изврши 24 „прецизни ракетни напади“, а армијата на таа земја објави дека нападите имале за цел уништување на терористичките инфраструктури, а целите биле „внимателно избрани“ со цел да се минимизираат штетите врз цивилите.
Пакистан тврди дека најмалку 26 лица се убиени, а 46 повредени во индиските напади, обвинувајќи ја Индија за убиство на цивили, вклучувајќи жени и деца, додека многу куќи долж линијата на контрола (LoC) се оштетени.
Од друга страна, на индиска страна, најмалку 10 лица загинаа, а најмалку 32 лица беа повредени. Сите смртни случаи се пријавени во округот Пунч, кој се наоѓа во близина на „Линијата на контрола“, границата меѓу Индија и Пакистан.
Портпаролот на пакистанската армија, Ахмед Шариф Чаудри, ја обвини Индија за „неодговорно однесување“ и ја повика меѓународната заедница да реагира на ова кршење на суверенитетот на Пакистан, а набрзо Министерството за надворешни работи на Пакистан реагираше со повикување на индискиот амбасадор во Исламабад за формално да изрази протест поради нападот.
Кашмир стана централна точка во односите меѓу Индија и Пакистан откако двете земји се ослободија од британската власт во 1947 година.
И претходно имало помали прекугранични и воени конфликти, обвинувања од едната и од другата страна. Особено Индија често обвинуваше, а Пакистан имаше проблеми да негира, дека е спонзор на терористички организации.
Во минатото, Пакистан честопати ја користел својата позиција како „послаба страна“.
„За жал, овој пат имаше воен конфликт од ограничено ниво, и покрај фактот што во меѓувреме двете земји станаа членки на Шангајската организација за соработка, која во себе содржи и елементи на воен сојуз, и покрај фактот што многу моќни центри кои одржуваат одлични односи со овие две земји, да ги споменеме само Москва и Пекинг, всушност се обидоа да влијаат врз двете страни да не се впуштаат во продлабочување на конфликтот“, додава Митровиќ.
Дали постои закана од нуклеарен конфликт?
Причината зошто меѓународната јавност се плаши од овој конфликт е тоа што обете земји поседуваат нуклеарно оружје.
Индија и Пакистан ги зголемија своите војски и нуклеарни арсенали со текот на годините. Индија беше првата што спроведе нуклеарен тест во 1974 година, по што следеше уште еден во 1998 година. Пакистан спроведе свои нуклеарни тестови набргу потоа, само неколку недели подоцна.
Оттогаш, страните се вооружија со стотици нуклеарни боеви глави, системи за испорака на ракети, напредни борбени авиони и модерно оружје.
Кратко по последниот конфликт, меѓународната јавност изрази загриженост за можноста за понатамошно влошување на ситуацијата.
Москва повика на воздржаност и изјави дека е длабоко загрижена поради ескалацијата на воената конфронтација, додека официјални лица во Лондон и Париз нагласија дека двете страни ќе мора да работат на намалување на тензиите за да се избегне понатамошна дестабилизација на регионот.
Загриженост, меѓу другите, изрази и американскиот претседател Доналд Трамп, кој изјави дека е „штета“ што се случил нападот и изрази надеж дека ситуацијата ќе биде брзо решена.
Пред околу две недели, 26 туристи беа убиени при посета на популарно одморалиште во Кашмир, кој е под индиска администрација. Сите жртви освен една беа индиски државјани.
Официјален Њу Делхи веднаш ја префрли вината врз Пакистан, ги прекина дипломатските врски и го суспендираше учеството во важниот договор за поделба на водата.
Исламабад негираше каква било вмешаност и рече дека ќе го смета секој обид за запирање или пренасочување на водата што ѝ припаѓа на Пакистан за воен чин.
Со зголемувањето на тензиите, индиската морнарица соопшти дека извршила пробни ракетни напади за да ја покаже својата сила, а индискиот премиер Нарендра Моди вети дека ќе ги гони напаѓачите „до крајот на светот“, додека ОН ги повика соседите да покажат „максимална воздржаност“.
Поделениот регион сега е едно од најтешко вооружените места во светот. Со децении, домашните милитантни групи кои бараат независност на Кашмир или негово припојување кон Пакистан се во војна со индиските безбедносни сили, во насилство во кое загинаа десетици илјади луѓе.
