Економијата на американската држава Калифорнија ја престигна економијата на Јапонија и стана четврта најголема во светот по бруто домашен производ.
Ова се податоците презентирани од Меѓународниот монетарен фонд (ММФ) и Бирото за економски анализи (БЕА), факт што го истакнува канцеларијата на гувернерот на Калифорнија додека се бори против трговските политики на претседателот Доналд Трамп.
ММФ го процени БДП на Јапонија на 4,02 трилиони долари во 2024 година. Тоа се споредува со БДП на Калифорнија од 4,1 трилион долари за истата година, според бројките на БЕА. Според ова, Калифорнија е зад Соединетите Американски Држави, Кина и Германија на глобалната листа.
„Калифорнија не само што е во чекор со светот – ние го поставуваме темпото“, рече гувернерот Гевин Њусом.
Се предвидува дека економијата на Калифорнија, зависна од увоз, ќе биде најтешко погодена од царините на Трамп, а гувернерот Њусом е меѓу најгласните критичари на трговските политики на претседателот.
Гувернерот изнесе нови податоци што ја истакнуваат позицијата на Калифорнија како најголема економска сила во земјата, која може да биде загрозена ако Трамп одбие да ги повлече своите трговски политики.
Според неодамнешната анализа на фирмата за истражување на политики „Трејд партнершн ворлдвајд“, Калифорнија ќе ги почувствува најлошите ефекти од царините што ги објави Трамп досега.
Проценките сугерираат дека земјата би можела да плати повеќе од 170 милијарди долари увозни даноци во 2025 година, под претпоставка дека побарувачката за увоз ќе остане иста од 2024 година.
Њусом претходно рече дека Калифорнија ќе се обиде да изгради нови трговски можности низ целиот свет за да ги ублажи ефектите од политиките на Трамп. Ќе се обидеме да склучиме сопствени трговски договори со странски партнери, додаде Њусом, и ќе бараме исклучоци за производи произведени во Калифорнија.
Гувернерот Њусом поднесе тужба против Трамп на 16 април поради користењето на вонредни овластувања за неговите царински планови, обвинувајќи го Трамп за заобиколување на уставните овластувања на Конгресот врз трговската политика.
