Европската унија (ЕУ) и Кина разменија мислења за зајакнување на нивната економска и трговска соработка како одговор на американските царини, објави „Reuters“, повикувајќи се на кинеското Министерство за трговија.
Во видео повик во вторникот, кинескиот министер за трговија Ванг Вентао разговараше со европскиот комесар за трговија и економска безбедност Марош Шефчович за продолжување на преговорите за олеснување на трговијата и за итно одржување дискусии за ценовните обврски околу увозот на електрични возила од кинеско производство.
Разговорот се случил непосредно пред да стапат на сила дополнителните царини на американскиот претседател Доналд Трамп за увоз од Кина.
Во средата Трамп рече дека привремено ќе ги намали високите царини што штотуку ги наметна на десетици земји. Сепак, тој го засили притисокот врз Кина, заканувајќи се дека ќе ги зголеми царините за втората по големина економија во светот на 125%.
Новите кинески царини од 84 отсто за увоз на американски стоки, исто така, стапија на сила вчера, што претставува нова етапа во трговската војна што ја започна Вашингтон. Новите царини ќе важат за сите американски производи кои влегуваат во Кина, чија вкупна вредност, според Канцеларијата на трговскиот претставник на САД, изнесува 1,1 милијарди долари во 2024-та година на 143,5 милијарди долари.
Кина е подготвена да ја продлабочи трговската, инвестициската и индустриската соработка со ЕУ, изјави Ванг во меѓувреме на Шефчович.
Тој ги повика Кина и ЕУ заеднички да го заштитат мултилатералниот трговски систем заснован на правила и да се придржуваат до трговската либерализација и олеснување, „што ќе донесе поголема стабилност и безбедност на светската економија и светската трговија“, додаде Министерството.
Кина и ЕУ, исто така, разговараа за создавање поповолна деловна средина за претпријатијата и прашања поврзани со трговските трансфери.
Земјите ќе продолжат да ја зајакнуваат комуникацијата во рамките на Светската трговска организација (СТО) и заеднички да ја промовираат нејзината реформа, додаде кинеското министерство.
Во октомври, ЕУ воведе дополнителни царини до 35,3 отсто за електричните возила од кинеско производство, откако спроведе истрага против субвенциите, како додаток на стандардните царини од 10 отсто за увоз на автомобили во блокот.
Кинеското Министерство за трговија минатата недела објави дека двете страни се согласиле да ги обноват преговорите за обврските за минимална цена за кинеските електрични возила, но не прецизираше распоред.
