Европскиот комесар за трговија Марош Шефчовиќ им рече на американските претставници дека новите царини од 20 отсто на претседателот Доналд Трамп за Европската унија (ЕУ) се „неоправдани“, но ја повтори посветеноста на ЕУ за „сериозни преговори“.
Шефчовиќ на платформата Х напиша дека имал разговор оценет како искрен со американскиот министер за трговија Хауард Лутник и со претставникот на Белата куќа за трговија Џејмисон Грир.
„Бев јасен. Американските царински мерки се штетни и неоправдани. На трговските односи (меѓу ЕУ и САД) им треба нов пристап. ЕУ е посветена на сериозни преговори, но исто така е подготвена да ги брани своите интереси“, рече Шефчовиќ.
На потегот на Трамп реагираше и Кина, која во петокот објави дека од 10 април ќе воведе царина од 34 отсто за увоз на сите американски производи како дел од одмаздничките мерки по одлуката на претседателот на Соединетите Американски Држави, Доналд Трамп, да воведе двоцифрени царини за голем број земји, вклучително и Кина, на чија стока воведе царина од 34 отсто.
