Значителниот скок на цените на основните земјоделски производи ги загрижува граѓаните, а пазарџиите и трговците се правдаат со високите трошоци за увоз и со недостатокот на домашно производство.
Во последниот предвелигденски период, цените на доматите, краставиците и пиперките достигнуваат рекордни суми, а граѓаните реагираат со незадоволство.
На зелените пазари и во маркетите во Скопје, цената на доматите се движи меѓу 80 и 120 денари за килограм, додека краставиците се продаваат од 70 до 100 денари. Пиперките бележат најголем пораст и достигнуваат дури и 150 денари за килограм. Вакви високи цени значат сериозен удар врз семејниот буџет.
Весна Доневска Алексовска, жителка на населбата Даме Груев, вели дека не памети ваков период кога основните производи биле толку скапи.
„Секој ден пазарам свеж зеленчук и овошје за семејството, но последниве денови станува речиси невозможна мисија. Претходно, со 500 денари можев да наполнам цела кеса со зеленчук, а сега со истиот буџет носам дома половина од тоа што ми треба“, вели нашата соговорничка.
Причините за високите цени, според продавачите, се должат главно на увезените производи.
Земјоделските производители и трговци се жалат дека домашното производство е минимално во овој период од годината и дека се приморани на увоз од Турција, Грција и од Албанија.
Зоран, долгогодишен продавач на пазарот во Ѓорче Петров, вели дека увозните производи со себе носат и високи транспортни трошоци.
„Доматите и пиперките моментално ги увезуваме, бидејќи домашните производители сè уште не ја почнале сезоната. Увозот е многу поскап годинава поради повисоките цени на горивата и транспортот. Ние како трговци мораме да ги покачиме цените за да не бидеме во загуба – објаснува пазарџијата.
Од друга страна, земјоделските експерти предупредуваат дека Македонија мора да ја зголеми домашната продукција за да се спречат вакви ситуации. Според нив, недоволно субвенционирање на земјоделството и намален интерес кај младите за работа во оваа област се главните причини за постојаното поскапување на храната.
„Состојбата е јасна. Потребни се долгорочни мерки и поголеми субвенции за земјоделците, како и стратегии кои ќе ги мотивираат младите да се насочат кон оваа гранка. Инаку ќе продолжиме да зависиме од увоз, кој ќе ни носи уште повисоки цени“, велат познавачите.
Додека граѓаните чекаат стабилизација на цените, една работа е јасна – без значајни промени во аграрната политика, зеленчуците на нашите пазари и понатаму ќе бидат луксуз.
Б.З.М.
