Прстигнува Apple Watch со камера?

Apple се соочи со бројни предизвици во развојот на вештачката интелигенција, но тоа не ја спречи компанијата да продолжи да експериментира со нови идеи. Според Марк Гурман од Bloomberg, Apple ја истражува можноста за додавање камери на своите паметни часовници Apple Watch, што би донело функционалност за визуелна интелигенција на зглобовите на корисниците.

Визуелната интелигенција им овозможува на корисниците и нивните уреди да комуницираат со нивната околина со помош на вештачка интелигенција. Оваа функција е веќе достапна на iPhone 16 со iOS 18.2 или понова верзија и нуди слична функционалност на Google Lens, кој користи сличен пристап со години.

И стандардните Apple Watch и Watch Ultra се очекува да добијат камери. Во стандардниот модел сензорот на камерата би се наоѓал внатре во екранот, додека кај Ultra моделот сензорот би бил поставен на страна, веднаш до копчето за вклучување. Гурман вели дека Apple Watch со камера би можел да се појави на пазарот до 2027 година.

Паметниот часовник не е единствениот уред за носење на кој Apple сака да стави камера. Според претходниот извештај, Apple тестира и слушалки AirPods со вградени камери кои исто така би поддржувале визуелна интелигенција.