Европската комисија по втор пат го одложи објавувањето на својот план за постепено елиминирање на зависноста на регионот од рускиот увоз на енергија од 26 март до неодреден датум, пренесува Ројтерс.
Комисијата одби да го коментира новиот датум, а судејќи според дисонантните тонови од Запад за тоа каде треба да водат односите со Русија, тоа не е неочекувано.
Комесарот за енергетика Дан Јоргенсен во ноември на парламентарно сослушување рече дека ќе го претстави планот во текот на првите 100 дена на функцијата, но тоа сега двапати беше одложено. Планот прво требаше да биде објавен во февруари.
ЕУ си постави необврзувачка цел да го прекине увозот на руски природен гас до 2027 година, откако Русија ја започна својата целосна инвазија на Украина во 2022 година. Сепак, некои земји-членки не направија многу за да успеат во оваа диверзификација, а увозот на руски гас дури се зголеми минатата година.
Блокот од 27 земји се соочува со тешка задача да ја балансира енергетската безбедност, а истовремено да ги намали цените за да ги одржи своите индустрии конкурентни со ривалите во Кина и САД, каде што трошоците за енергија се неколку пати помали, така што рускиот гас останува опција. Некои критичари велат дека целта на ЕУ да се одвикне од рускиот гас ризикува да ги зголеми и онака високите цени на гасот и дека целите треба да бидат флексибилни.
