Европската комисија (ЕК) го објави својот предлог за поддршка на позеленувањето на индустријата, за да се исполнат еколошките цели, но и да се зачува конкурентноста на европската економија. Документот предвидува поголем пристап до европските финансирања и промоција на приватни инвестиции.
За таа цел, Брисел ќе создаде банка за индустриска декарбонизација, која ќе мобилизира 100 милијарди евра за секторот. Средствата ќе доаѓаат од постоечките европски фондови, вклучувајќи го и Фондот за иновации, како и од приходите од шемата за тргување со емисии на ЕТС.
Предлогот на ЕК вклучува и идеја за создавање центар за заеднички набавки на суровини неопходни за енергетската транзиција. Ќе се намали и бирократијата при одобрување зелени проекти.
Од Брисел објаснуваат, на пример, дека одобрувањето за проекти за ветер може да трае од 7 до 10 години, а за енергетските мрежи од 8 до 10 години. Само осум земји ги применуваат принципите за брзо лиценцирање зелена енергија, кои се предвидени во Директивата за обновлива енергија.
Брисел во својот план признава дека на енергетско интензивните компании им е потребна поддршка за декарбонизација и електрификација на производството бидејќи високите цени на енергијата и нелојалната глобална конкуренција ги ставаат во неповолна положба. Според проценките, чистите технологии се темел на идниот раст на индустријата и се клучни за индустриските промени.
Планот за поддршка на позеленувањето на индустријата вклучува и фокус на циркуларната економија, со цел да се искористат ограничените европски ресурси што е можно поефикасно и подолго. На овој начин ЕУ ќе биде понезависна од увоз на ресурси од трети земји.
