Бакарот е следниот метал кој потенцијално би можел да биде засегнат од царините. Американскиот претседател Доналд Трамп нареди студија за увозот на бакар, што може да се смета како чекор кон воведување царини за увоз на метал во САД, пишува „Euronews“.
САД бараат можности за зголемување на домашното производство на бакар. Металот се користи во широк спектар на производи – кабли, апарати, електрични возила, центри за податоци и многу повеќе.
Бакарот е исто така клучна компонента во енергетската транзиција бидејќи се користи за производство на соларни панели и турбини на ветер.
Претходно овој месец, Трамп објави царини за увоз на челик и алуминиум, кои се очекува да стапат на сила на 12-ти март 2025-та година. Тарифата од 25% за увозот од Мексико и Канада, исто така, треба да стапи на сила по едномесечното одложување што е моментално во сила. Одделно, дополнителна царина од 10% веќе е на сила за кинескиот увоз во САД.
Трамп, исто така, се закани дека ќе воведе реципрочни царини за одделни земји.
Истрагата на американскиот претседател за увозот на бакар придонесува за брзата ескалација на глобалните трговски тензии во време кога трговските односи меѓу Вашингтон и Брисел и Вашингтон и Пекинг се сериозно затегнати.
Питер Наваро, виш советник за трговија и производство на американскиот претседател, коментираше дека Кина долго време ги користи индустрискиот капацитет и дампингот како економско оружје за да доминира на глобалните пазари. Според него, ова систематски ги поткопува конкурентите и ги истерува од бизнисот.
Извозот на бакар од Кина се зголемува во 2024-та година поради заостанатата домашна побарувачка, што остава значителни вишоци за извоз. Земјата е четврти по големина производител на бакар на глобално ниво. Чиле е лидер, потоа Демократска Република Конго и Перу.
Чиле, исто така, се соочува со проблеми во последно време, со намалување на содржината на бакар во рудата извадена од некои рудници, штрајкови и несреќи. Зголемените трошоци за производство и недостигот на вода ги влошуваат овие проблеми. Сето ова води кон зголемена загриженост за потенцијалот за раст на цените на бакарот во наредните месеци.
