Американскиот претседател Доналд Трамп воведе царина од 25 отсто за увоз на алуминиум и челик, што ќе влијае на 1 отсто од европскиот извоз во САД. Според пресметките на аналитичката единица на холандската банка „ING“, оваа акција ќе предизвика европските производители на челик да загубат 3 милијарди евра, а за алуминиум околу 2 милијарди евра.
Трамп воведе и реципрочни царини, за кои сѐ уште се водат анализи како тие ќе влијаат на европскиот извоз.
Но, и Европа има свој одговор, пишува „ING“. Според аналитичарите, од есента во Брисел се подготвуваат списоци за можен одговор на трговската војна од страна на САД. Ова е најдобро чуваната тајна на Европската комисија (ЕК) и никакви детали од овие планови никогаш не станаа јавна информација.
ЕК е директно одговорна за трговските односи на заедницата, но дури и тогаш тоа можеби нема да биде доволно за брз одговор. Сепак, тука има една придобивка од бавната машина на Брисел – во 2018-та година, како одговор на тогашните тарифи на Трамп за челик и алуминиум, ЕУ за возврат воведе мерки за увоз на соја, сок од портокал и мотоцикли. Тие не беа укинати, туку одложени до 31-ви март 2025-та година, што значи дека може брзо да се активираат.
Брисел може да ја ограничи продажбата на стоки во САД со извозни давачки. Во 2022-ра година беа идентификувани 22 европски стоки од клучно значење за американската економија – главно од хемиската и фармацевтската индустрија. „ING“ забележува дека ова може да биде потпора за Брисел, но треба да се земе предвид дека и Вашингтон би можел да одговори реципрочно.
Аналитичарите се категорични – во овој случај Доналд Трамп не бара добра зделка, туку дополнителен приход со кој ќе ги финансира даночните намалувања и ќе го поткопа економскиот конкурент. Тие потсетија дека за време на претходниот мандат на Трамп, ЕК вети дека ќе купи повеќе течен гас и соја, а со тоа ги избегна царините за автомобилите. Европа сега е најголемиот пазар за американските производители на течен гас, но земјите немаат многу избор по исклучувањето на гасоводот од Русија.
Веројатно е дека рачката за течен гас сега тешко може да се користи, пишува „ING“, додавајќи дека друга опција е ветувањето за повеќе набавки на американско оружје и зголемување на трошоците за одбрана – од 2% на 3% или дури 4%.
ЕУ има можност и да ги намали царините за американските автомобили – тарифата за увоз на европски автомобили во САД е 2,5%, а увозот на американски автомобили во Европа се оданочува со 10%. Сепак, тоа ќе значи дека и другите земји мора да ги добијат истите услови, според правилата на Светската трговска асоцијација (СТО).
Можност за реакција дава и воведувањето данок на дигитални услуги.
„ING“ известува дека ЕУ е подобро подготвена за политиките на Доналд Трамп, но успехот во голема мера зависи од брзиот и координиран одговор од Брисел.
