Претседателката на Европската комисија Урсула фон дер Лајен планира да се сретне со лидерите во индустријата на 26-ти февруари во обид да ги увери најголемите домашни производители во регионот дека Европската унија (ЕУ) ќе дејствува за да ја зајакне нивната конкурентност за време на прегледот на еколошките регулативи.
Состанокот најверојатно ќе се одржи откако извршното тело на блокот претходно во текот на денот го претстави Договорот за чиста индустрија – стратегија што треба да и помогне на Европа успешно да се натпреварува со американските и кинеските ривали, велат извори запознаени со ова прашање.
Шефовите на неколку големи индустриски компании ќе се сретнат со Фон дер Лајен во Антверпен, каде што пред една година потпишаа декларација со која ја повикуваат ЕУ да ги намали трошоците за енергија и регулаторниот товар на зелените регулативи, додаваат изворите.
Претставник на ЕК одби да коментира.
Фон дер Лајен ја направи конкурентноста на европската индустрија главен политички приоритет за време на нејзиниот втор мандат како претседател на Комисијата. Додека ЕУ продолжува да ги следи своите амбициозни цели за намалување на емисиите на стакленички гасови, високите трошоци за енергија и кинеските субвенции ги зголемија стравувањата за иднината на европските производители. Промената на правецот на американскиот претседател Доналд Трамп за климатските цели и ризикот од трговска војна придонесе за влошување на расположението.
Планот на Фон дер Лајен е да ги ублажи овие грижи и да се обиде да ја задржи индустријата во Европа со ветување прифатлива енергија, финансирање зелени инвестиции и изградба на нови пазари. Според Договорот за чиста индустрија, зелените правила ќе бидат поедноставени и компаниите ќе имаат полесен пристап до ресурсите и поодржливи синџири на вредности.
