Европската унија (ЕУ) мора да ги удвои своите трошоци за одбрана, соочена со итни инвестициски потреби од најмалку 100 милијарди евра, според четири земји-членки кои граничат со Русија, пренесува „Bloomberg“.
Документот, подготвен од Литванија, Естонија, Летонија и Полска, ја повикува ЕУ да ги искористи заедничките можности за задолжување, да и овозможи на Европската инвестициска банка (ЕИБ) да троши на основните одбранбени потреби и да работи со европските партнери надвор од блокот јасно упатување на Обединетото Кралство.
Земјите што ја предводат воената поддршка за Украина против руската инвазија наведуваат проценки дека сегашните воени трошоци на земјите-членки на ЕУ изнесуваат околу 326 милијарди евра во 2024-та година. Документот заклучува дека оваа бројка мора да се удвои ако блокот сака да постигне цел на трошење од најмалку 3 отсто од бруто домашниот производ (БДП), како и да биде подготвен за „екстремни воени непредвидени ситуации“.
ЕУ во моментов подготвува нова одбранбена стратегија, а водачите на блокот треба да се состанат неформално во Брисел во понеделник за да дадат свој придонес.
Овој проект треба да биде претставен во март, со цел планот да биде усвоен до крајот на годинава. Додека повеќето земји-членки се согласуваат за потребата да се преиспитаат европските одбранбени способности, индустријата и севкупната подготвеност, земјите од блокот имаат различни ставови за тоа како да го направат тоа.
Некои земји, особено Германија, долго време се противат на употребата на заеднички заеми за одбранбени цели. Американскиот претседател Доналд Трамп изјави дека сака членките на НАТО да потрошат 5 отсто од БДП за одбрана – ниво што дури и САД во моментов не успеваат да го постигнат.
Претседателката на Европската комисија (ЕК) Урсула фон дер Лајен претходно изјави дека ЕУ мора да инвестира најмалку 500 милијарди евра во следната децениј во одбрана, но документот што го разгледа „Bloomberg“ вели дека има итни потреби кои не можат да чекаат до следниот буџетски циклус во 2028-ма година.
Во документот од четирите земји се предупредува дека Русија веќе почнала да ги зголемува своите воени сили и произведува три пати повеќе артилериски гранати од Европа и САД заедно. Блокот, исто така, се соочува со други предизвици поради зависноста од синџирот на снабдување од Пекинг и продлабочените врски на Москва со Кина, Иран и Северна Кореја.
Според документот, барањата на ЕУ вклучуваат најмалку 50 милијарди евра за зголемување на производството на артилериски гранати и стратешки залихи.
Блокот, исто така, мора да обезбеди постојана и одржлива воена поддршка на Украина. Киев има растечки индустриски капацитет, но има потреба од финансиска поддршка, се забележува во документот. За да го олесни ова, ЕУ треба да преземе акција за запленување на замрзнатите средства на руската централна банка. Досега, блокот го користеше само профитот генериран од замрзнатите средства, а конфискацијата е контроверзен чекор што Германија и Белгија, меѓу другите, досега го отфрлија.
Другите клучни приоритети треба да вклучуваат европски штит за противвоздушна и ракетна одбрана, зајакнување на границите на блокот со Русија и Белорусија и подобрување на нејзината способност за движење и распоредување сили, се вели во документот.
ЕУ треба тесно да соработува со НАТО и да осигура дека нејзините стандарди и цели се усогласени и тесно усогласени со оние на воената алијанса, рекоа четирите земји-членки. Во овој поглед, тие тврдат дека ЕУ би можела да размисли за поставување цели за градење капацитети за критичните способности, како што се противвоздушна одбрана, муниција и средства за електронско војување, кои можат брзо да се распоредат во одредена временска рамка.
Четирите земји, исто така, ја повикуваат ЕУ да не ги ограничува напорите за набавки на добавувачите од блокот, туку да усвои отворен пристап кон одбранбената индустриска соработка надвор од земјите-членки. Некои главни градови инсистираат поголемиот дел од средствата на ЕУ да се трошат дома и покрај недостатокот на капацитет.
