Цените за транспорт на нафта со супертанкер драстично се зголемија откако САД воведоа нови санкции за рускиот нафтен сектор, предупредија трговците и посредниците во транспортниот сектор.
Американскиот Стејт департмент минатиот петок објави дека вовел санкции за руските нафтени компании Гаспром Нефт и Сургутнефтегаз и 183 бродови кои превезувале руска нафта, како и трговци, осигурители и транспортери на руска нафта.
-САД преземаат широки мерки против клучниот руски извор на приходи за финансирање на војната против Украина, рече секретарката Џенет Л. Јелен.
„Логиката на санкциите е да се покрие секоја фаза од руското производство и дистрибуција на нафта“, рече претставник на Белата куќа, додавајќи дека нивното правилно спроведување може да ги намали руските приходи за милијарди месечно.
Новите американски санкции ќе му нанесат тежок удар на рускиот извоз и ќе ги принудат Индија и Кина да набавуваат повеќе нафта од Блискиот Исток, Африка и Америка, велат трговците и аналитичарите.
Кинеската филијала на Синопек, Унипек, изнајми неколку многу големи носачи на сурова нафта (VLCCs) способни да пренесат два милиони барели нафта минатиот петок, а цените на товарот нагло скокнаа, велат извори од индустријата.
На рутата на Блискиот Исток до Кина, тие се зголемија за 39 отсто од минатиот петок, достигнувајќи го највисокото ниво од октомври, на 37.800 долари, изјави неименуван брокер.
Нагло порасна и цената на транспортот на руската нафта во Кина.
Така, цената на транспортот на нафтата со танкери Афрамакс од руското пристаниште Козмино во Тихиот Океан до северна Кина се зголеми за повеќе од двојно и во понеделникот достигна 3,5 милиони долари. Сопствениците на бродови сега наплаќаат значително повисоки цени поради ограничената тонажа на таа рута, според податоците на S&P Global Commodity Insights.
Најголемиот скок беше во тарифите за превоз на супертанкер на рутата од Блискиот Исток до Сингапур, од WS11.15 (Светска номинална товарна скала на танкери) минатиот петок до WS61.35 денес. WS е единица за пресметување на цените на товарот во секторот за транспорт на танкери што се базира првенствено на трошоците на нафтената индустрија.
На рутата на Блискиот Исток до Кина, цените на товарот се зголемија од 10,40 WS на 59,70 WS. Испораката на нафта од Западна Африка до Кина денес чини 61,44 WS, во споредба со WS9,55 претходно, рече друг брокер.
Трошоците за транспорт на нафта од Мексиканскиот залив до Кина се зголемени за 360.000 долари и сега чини 6,82 милиони долари, додаде тој.
Снабдувањето со капацитет беше дополнително оптоварено со стопирањето на санкционираните танкери пред кинеската провинција Шандонг, имајќи предвид дека компанијата која управува со пристаништата со големи нафтени терминали, Шандонг Порт Груп, им забрани да се истоваруваат пред одлуката на САД за санкции.
Ситуацијата може дополнително да се влоши бидејќи трговците почнаа да бараат бродови кои не се под санкции за да обезбедат капацитет за транспорт на руска и иранска нафта.
-Очекуваме во следните месеци да бидат вклучени повеќе бродови во „сивата флота“, што ќе ја намали понудата (капацитет) и на несанкционираниот транспортен пазар, предупредуваат аналитичарите на специјализираната компанија Кплер во забелешка.
