Судот во Келн им забрани на германските компании да ги рекламираат своите чоколадни производи како „Дубаи чоколадо“, доколку тие не се произведени во Дубаи. Како што пренесуваат германските медиуми, судиите во две забрзани постапки донеле одлука дека термините „Дубаиско чоколадо“ ги доведуваат во заблуда потрошувачите.
Засегнати компании беа Medi First GmbH, со својот производ „Miskets Dubai Chocolate“ и KC Trading UG, која го продава чоколадниот бар „Elit – The Taste of Dubai“. Доколку ја прекршат забраната, директорите се соочуваат со казна затвор до шест месеци или парична казна до 250.000 евра.
Измама со лажни информации за потеклото
Судиите ја оправдаа својата одлука со тоа што просечниот потрошувач ќе заклучи од името на производот дека чоколадото е произведено во Дубаи. Описите на англиски јазик и рекламните изјави како „Taste of Dubai“ или „a touch of Dubai“ дополнително го зајакнаа тој впечаток. Иако малата белешка „Потекло: Турција“ на задната страна на пакувањето не е доволна за да се исправи оваа дезинформација, пишува магазинот „Феникс“.
Тужбата ја поднесе компанијата MBG International Premium Brands GmbH од Падерборн, која е ексклузивен увозник на „Хабиби бар“ од Дубаи во Германија. Компанијата го цитираше законот за трговски марки, кој забранува употреба на географски ознаки освен ако производите потекнуваат од наведениот регион.
Судскиот спор ги оптеретувадисконтите и производителите
Овие пресуди би можеле да имаат далекусежни последици за пазарот. Од почетокот на трендот „Дубаи чоколадо“, бројни производители лансираа свои варијанти, често произведени во Германија или Турција. МБГ веќе размислува за дополнителни правни мерки против други производители и дистрибутери.
Увозникот Андреас Вилмерс, кој тврди дека официјално извезува „Дубаи чоколадо“ под името „Fex“, исто така го предупреди Aldi, како и производителот на чоколади Lindt, поради наводното погрешно рекламирање.
Адвокатот за интелектуална сопственост Кристијан Шварц истакнува дека пресудите на судот во Келн се однесуваат на конкретни случаи. Другите судови може да заземат поинаков правен став и да го толкуваат терминот „Дубаи чоколадо“ како име за специфичен вид чоколада – слично на случајот со „Винер Шницел“. Одлуките се донесени по забрзана постапка, без усни аргументи, додека главните расправи се уште траат, јавуваат германските медиуми.
