Кафето, една од најважните суровини на светскиот пазар, бележи рекордни цени, а аналитичарите предупредуваат дека тешко ситуацијата наскоро ќе се стабилизира.
Со зголемените предизвици во одгледувањето на сирово кафе и дистрибуцијата, се предвидува дека цената на оваа стока ќе остане висока во новата година.
Цената на Арабика, која сочинува меѓу 60% и 70% од глобалната понуда на кафе, последен пат беше толку висока во 1977 година, кога снегот уништи големи плантажи во Бразил, водечки производител на кафе.
Речиси 50 години подоцна, сушите и високите температури во клучните производни региони, заедно со потпирањето на ограничен број производители, се главните причини за овој скок на цените.
Покрај климатските катастрофи, глобалните проблеми во синџирите на снабдување и логистиката, предизвикани од конфликти и глобални немири, дополнително ја комплицираат ситуацијата, па не изостана ниту вториот најзастапен вид кафе, робуста.
Цената на робуста достигна ново рекордно високо ниво на крајот на ноември.
