Европската централна банка (ЕЦБ) ќе продолжи да ги намалува каматните стапки бидејќи ризиците за изгледите за инфлација сега се „двострани“. Ова го изјави претседателката на финансиската институција Кристин Лагард, цитирана од „Bloomberg“.
Во говорот неколку дена откако ЕЦБ ги намали трошоците за задолжување на 3%, таа им рече на новинарите во Вилнус дека насоката на патување е јасно „надолна“ и дека минатонеделниот чекор „не е последното намалување на стапката што ќе го направиме“.
„Она што сега го гледаме е промена во ставот за ризик. Иако досега нашата прогноза за инфлацијата беше поврзана со нагорен ризик, сега мислиме дека ризиците се двострани, наспроти избалансираните“, објасни Лагард.
И по четири намалувања, финансиската институција со седиште во Франкфурт смета дека на нивното сегашно ниво, каматните стапки сè уште ја ограничуваат економската активност. Според повеќето централни банкари, политиката може постепено да премине од рестриктивна кон неутрална, ниту да го ограничува ниту стимулира растот. Според трговците, оваа точка би можела да се достигне веќе кон средината на следната година.
Предизвикот е што овој праг е одреден од различни сили и е тешко да се следи во реално време. Лагард претходно ја виде неутралната каматна стапка во опсег помеѓу 1,75% и 2,5%, иако членката на Извршниот совет Изабел Шнабел неодамна рече дека таа може да достигне и до 3%.
Оваа дебата доаѓа кога економијата на еврозоната се соочува со сериозни тешкотии, а домаќинствата и компаниите се двоумат да трошат пари во услови на зголемена неизвесност. Најновите прогнози на ЕЦБ покажуваат дека растот ќе се забрза до 1,1% следната година, но конфликтите ширум светот, реизборот на Доналд Трамп за претседател на САД и политичките превирања дома значат дека тој може да биде послаб.
Аналитичарите предвидуваат последователни намалувања на трошоците за задолжување додека каматната стапка на депозитите не достигне 2%. Некои инвеститори се обложуваат и на можноста за поголемо намалување за половина процентен поен, нешто што не го исклучуваат ниту централните банкари.
