Во ноември месечната инфлација во Русија се забрза на 1,43% во однос на 0,75% во октомври, покажуваат податоците на Росстат, цитирани од „Ведомости“.
Руското издание забележува дека порастот е нетипичен за ноември и дека инфлацијата веќе достигна највисоки нивоа во последните 22 години. На годишна основа, во ноември измерената инфлација достигна 8,88%, додека во октомври 8,54%. Најзначајно поскапување на прехранбените производи – за 2,33%.
Само за првите девет дена од декември цените поскапеа за 0,62%, тоа е видливо и од статистиката. Се зголемуваат цените на електричните апарати и смартфоните, што експертите ги поврзуваат со набавките за божиќните празници, но растот е 0,48%, што аналитичарите го дефинираат како „многу голем“.
Во ваква ситуација уште поверојатно е Централната банка да преземе ново зголемување на каматите, а експертите не се децидни до кои нивоа. Според некои од нив, на средбата на 20 декември каматната стапка ќе се зголеми на 23%, а според други – на 25%. Во октомври банката ја зголеми главната каматна стапка во земјава на рекордни 21 процент.
Во месечната прогноза на институцијата за состојбата на руската економија во 2024-та година, очекувањата за нивото на инфлација беа нагло променети – од 7,7% на 9,2%. Веќе се очекувањата дека инфлацијата ќе остане висока и во 2025 година – во ажурираната прогноза објавена на 11-ти декември се очекуваат нивоа од околу 6% наспроти 5,3% во ноемвриската анализа.
Една од причините за забрзување на инфлацијата во Русија е големата јавна потрошувачка, главно поврзана со војната во Украина. Пред еден ден податоците за реализацијата на буџетот на земјата покажаа намалување на главните приходи – од нафта и природен гас, што ќе ги стави на тест и финансиите на земјата.
Во меѓувреме, пратениците од „Само Русија – за вистината“ најавија дека подготвуваат предлог-закон според кој пратениците можат да побараат од претседателот да го смени гувернерот на централната банка, пишува ТАСС. Во текстовите се предвидува и лична одговорност на првиот човек на централната банка за финансиската состојба на стопанството.
