Во следните четири години, четвртина од музичарите би можеле да се соочат со загуба на приход поради ширењето на музиката генерирана од вештачка интелигенција, се вели во извештајот.
Овој алармантен податок доаѓа од студијата за влијанието на вештачката интелигенција врз музичката индустрија, која предвидува дека креаторите на музиката ќе загубат до 10 милијарди евра во следните пет години. Само во 2028 година се очекува годишна загуба од дури 4 милијарди евра, доколку стапката на пенетрација на содржината генерирана од вештачката интелигенција продолжи да расте.
Вештачката интелигенција ги збогатува технолошките компании на сметка на уметниците
Истражувањето, спроведено од меѓународната организација за заштита на правата CISAC, открива дека музиката генерирана од вештачка интелигенција значително ќе ги загрози приходите на човечките креатори, а истовремено ќе ги збогати технолошките компании. Се предвидува дека истите 4 милијарди евра што ги губат музичарите ќе завршат во рацете на технолошките фирми кои развиваат музика со вештачка интелигенција, додека вредноста на пазарот на некреативна музика ќе порасне на 16 милијарди евра годишно до 2028 година.
Овој феномен најверојатно ќе се одрази прво на платформите за стриминг, каде што автоматските плејлисти ќе ги насочуваат корисниците да слушаат музика со вештачка интелигенција наместо онаа создадена од човечки уметници. Голем дел од оваа музика ќе биде наменета за слушање во позадина на јавни места и преку пасивни плејлисти.
Загуба во аудиовизуелната индустрија
Освен во музиката, проблемот ќе биде уште поголем и во аудиовизуелната индустрија. Пазарот на содржина генерирана од вештачка интелигенција се очекува да порасне на 48 милијарди евра до 2028 година. Ова вклучува видео содржини генерирани целосно со вештачка интелигенција, но и примена на алатки за вештачка интелигенција за режирање и скриптирање.
Додека некои гледаат на вештачката интелигенција како алатка која може да им помогне на уметниците, студијата предупредува дека најголемата придобивка ќе ја имаат технолошките компании, кои можат масовно да произведуваат содржина по пониска цена од уметниците.
Загрозени се авторските права
Друг важен проблем е тоа што моделите со вештачка интелигенција се „обучуваат“ за дела создадени од луѓе, често без нивна согласност. Повеќето од сегашните модели користат заштитени дела во процесот на обука, без овластување.
Генералниот директор на CISAC, Гади Орон, рече: „Студијата ја покажува огромната важност што авторските дела им ја носат на компаниите кои развиваат вештачка интелигенција Тој додаде дека наодите укажуваат на длабока неправда: „креаторите се исклучени од профитот генериран од нивните дела, додека AI компаниите остваруваат енормни приходи“.
Претседателот на CISAC, Бјорн Улвеус, предупреди: „AI има потенцијал да отвори нови можности за креаторите, но ако е лошо регулирана, може да предизвика огромна штета на нивните кариери и средства за живот“.
Ова е прва глобална студија за проценка на економското влијание на креаторите на музика и аудиовизуелна содржина генерирана од вештачка интелигенција. CISAC ги повикува носителите на одлуки да ги променат законите за да ги заштитат креативните индустрии и луѓето кои работат во нив.
