Буџетот на Франција е под таков притисок што пратениците им предлагаат на Французите да работат дополнителни седум часа, еквивалент на еден работен ден, секоја година без плата за да генерираат дополнителни пари за касата.
Мерката беше одобрена од Горниот дом на парламентот во средата, но сепак може да биде отфрлена од конечниот предлог-закон за буџетот. Според прогнозите на кабинетот, тоа ќе донесе дополнителни приходи за 2,5 милијарди евра, пренесува „Reuters“.
Кревката владина коалиција на премиерот Мишел Барние се обидува да го протурка буџетот за 2025-та година преку високо фрагментираниот парламент. Екстремно десничарската партија Национално собрание на Марин Ле Пен се заканува дека ќе ја собори владата со гласање недоверба.
Амандманот, предложен од централнодесничарската сенаторка Елизабет Доино, ќе предвидува луѓето да работат дополнителни седум часа во одреден момент во годината, за што нема да бидат платени, но за кои нивните работодавци ќе треба да плаќаат дополнителни придонеси за социјално осигурување.
Претходната идеја која би имала ист ефект врз буџетот бараше да се откаже еден од државните празници во Франција, за тој ден да биде работен ден. Но, не беше постигнат договор кој празник да се укине.
Франција веќе го отстрани статусот на Педесетница како државен празник во 2005-та година за да помогне во подобро финансирање на здравствената заштита.
Париз воведе 35-часовна работна недела во 2000-та година, но всушност Французите работат во просек околу 36 часа неделно, повеќе од многу западноевропски земји.
Откако трошењето излезе од контрола оваа година и даночните приходи не ги исполнија очекувањата, владата на Барние предложи заштеда од 60 милијарди евра во буџетот за 2025-та година, преку намалување на трошоците и зголемување на даноците. Иако владата ги фокусираше најголем дел од своите напори на богатите и големите компании, нацрт-законот за буџетот за следната година вклучува планови за ограничување на даночните олеснувања за придонесите за социјално осигурување на работодавачите за работниците со ниски примања.
Компаниите веќе се револтираа дека намалените даночни олеснувања ќе ги зголемат нивните трошоци за работна сила, веќе меѓу највисоките во Европа.
Мерачот на ризик на француските обврзници скокна на едномесечен максимум поради загриженоста на пазарот поради преговорите за буџетот и претстојното намалување на кредитниот рејтинг на земјата.
Премијата што ја бараат инвеститорите за задржување на францускиот долг над еквивалентен германски долг се зголемува секој ден оваа недела и е блиску до нивото од 80 базични поени.
Се чини дека сегашните буџетски планови ќе добијат одобрение од Европската унија (ЕУ), иако извршната власт на блокот сè уште бара поголема јасност за некои реформи.
