Доларот ќе биде силен уште долго пред се поради плановите на новоизбраниот американски претседател Доналд Трамп да воведе високи царини, изјавија стратезите на американската банкарска корпорација Голдман Сакс.
Американската валута расте од крајот на септември, што влијаеше на корекција на долгогодишната позиција на њујоршката банка дека доларот постепено ќе паѓа од својот врв.
Веќе не очекуваме пообемна депрецијација на доларот, бидејќи тој ќе биде посилен на подолг период“, напиша тимот на експерти.
Предвидувањата на банката за изминатите две години беа дека американската валута ќе падне од највисоките нивоа, но тоа беше спречено со растот на доларот за 2,4 отсто од изборите на 5 ноември.
Блумберг забележува дека американската валута ја заврши седмата последователна недела на раст, што е најдолг период од февруари и е реакција по изборот на Доналд Трамп за претседател и неговите планови за зајакнување на доларот и воведување повисоки буџетски приходи. Колку и да се оптимисти стратезите за доларот, нивните прогнози сè уште го гледаат под нивото од 2022 година.
