Европа треба да инвестира 39 милијарди евра годишно за да ги постигне своите цели за јаглеродна неутралност во транспортниот сектор до 2050-та година, објави еколошката групација Транспорт и животна средина (T&E), обезбедувајќи клучни препораки за Европската унија (ЕУ).
Блокот се залага за покоординирана индустриска политика која вклучува големи инвестиции, вклучително и во зелени технологии, откако поранешниот шеф на Европската централна банка (ЕЦБ) и италијански премиер Марио Драги го објави својот извештај за економски насоки во септември.
„Итно е потребна инвестициска стратегија на ниво на ЕУ за одлучно да се поддржи декарбонизацијата на транспортот и да се подобри конкурентноста на секторот“, се вели во извештајот на „T&E“.
Потребните инвестиции ги надминуваат за 5 милијарди евра од 34 милијарди евра годишно предвидени за субвенции за фосилни горива во транспортот во Европа. Во извештајот се препорачува постепено укинување на ваквите субвенции во корист на зелениот транспорт.
Новите упатства доаѓаат во време на намалена побарувачка за електрични автомобили и повици на некои политичари и директори на автомобилската индустрија – вклучително и италијанскиот премиер Џорџија Мелони и шефот на БМВ Оливер Ципсе – да ја укинат забраната за продажба на автомобили со мотори со внатрешно согорување од 2035 година.
„T&E“ со седиште во Брисел, исто така, повикува на буџет на ЕУ повеќе фокусиран на животната средина со рационализиран пристап до фондовите на блокот, воведување социјален инвестициски план од 1 трилион евра и инвестиции за климата до 2034-та година, поголема улога на Европската инвестициска банка (ЕИБ) во трансформацијата на системот за мобилност и зголемено учество на приватните финансии.
„T&E“ вели дека вкупните инвестиции, вклучувајќи ги и трошоците на приватните инвеститори, треба да достигнат годишно ниво од 310 милијарди евра до 2030-та година за да се постигнат петте препораки и да се декарбонизираат клучните транспортни сектори како што се авијацијата, превозот, автомобилите, автобусите и камионите.
Вкупните трошоци треба да пораснат на 507 милијарди евра годишно до 2040-та година, со што вкупниот износ ќе достигне 7,6 трилиони евра, како што се зголемуваат промените, се посочува во извештајот.
„Колку порано се инвестираат, толку ќе биде помала сметката за транзиција“, нагласуваат од „Т&Е“.
