Потрошувачите во еврозоната се оптимисти и во иднина очекуваат помала инфлација

Потрошувачите во еврозоната очекуваат просечната инфлација во следните 12 месеци да биде 2,4 отсто, што претставува пад во однос на 2,7 отсто од претходната августовска анкета, е заклучокот на истражувањето на Европската централна банка (ЕЦБ) за септември. Инфлациските очекувања на граѓаните на еврозоната за следната година сега се најниски од септември 2021 година.

Инфлациските очекувања за следните три години се исто така пониски од минатиот месец, бидејќи потрошувачите рекоа дека очекуваат инфлацијата да биде 2,1 отсто, што е помалку од август кога предвидуваа просечна инфлација од 2,3 отсто во следните 36 месеци, се вели во извештајот.

Потрошувачите очекуваат економскиот пад во следните 12 месеци да биде 0,9 отсто, што е исто како и во август.

И анкетираните граѓани сметаат дека нивниот номинален приход ќе се зголеми за 1,3 отсто во следните 12 месеци, односно со побавно темпо од стапката на инфлација.

Истражувањето е спроведено онлајн на примерок од околу 19.000 возрасни потрошувачи од 11 земји од еврозоната, поточно во Белгија, Германија, Шпанија, Франција, Италија, Холандија, Ирска, Грција, Австрија, Португалија и Финска, се наведува на веб-страницата на Европската Централната банка.