Руската рубља поевтинува и е на пат да достигне 100 рубљи за долар, но овојпат властите изгледаат подготвени да ја остават да достигне цена која инаку би предизвикала силна владина интервенција.
Слабата рубља сега не е причина за загриженост и ќе има корист за државниот буџет поради плановите за зголемување на трошоците следната година, изјавија за „Bloomberg“ две лица запознаени со ова прашање. Властите се склони да дозволат рубљата да достигне 100 за долар, велат изворите, кои сакаа да останат анонимни.
Централната банка на Русија се потпира на меѓубанкарски трансакции за да го пресмета курсот на рубљата откако Московската берза го прекина тргувањето со евра и долари поради американските санкции од јуни. Ограничувањата го влошија веќе постоечкиот недостиг на валута, а рубљата сега е за околу 9% послаба во однос на доларот и еврото на последниот ден од тргувањето, според податоците на централната банка.
„Во сегашната ситуација, 100 рубли за долар не е толку страшно, иако има одреден инфлаторен ефект“, коментира Олег Вјугин, поранешен претставник на руската централна банка.
Владината прес-служба, како и онаа на регулаторот, не одговорија веднаш на барањето за коментар.
Во истиот период, рубљата поевтини и во однос на кинескиот јуан, кој стана главна алтернатива на она што Кремљ ги нарекува „токсични“ валути на непријателските земји. Руската валута падна за 11% во однос на јуанот на Московската берза на околу 13,26 рубљи за јуан, што е најслаб учинок од мај.
Досега, рубљата двапати во изминатата година го надмина прагот од 100 за долар. Централната банка одговори со зголемување на основната стапка за 350 базични поени на вонредниот состанок во август минатата година. Владата потоа воведе строги капитални ограничувања во октомври, барајќи од 43 групи извозници да вратат 80 отсто од својата девизна заработка и да ги продаваат речиси целосно за рубљи на домашниот пазар.
Прогнозите на Министерството за економија покажуваат дека владата очекува послаба валута – 96,5 рубљи за долар во 2025-та година, наспроти 91,2 рубљи за долар оваа година.
Пониската цена на рубљата ги одразува тешкотиите за увозниците и извозниците во склучувањето на надворешно-трговски договори, коментира Дмитриј Полевој, инвестициски директор на московската „Astra Asset Management“.
Бизнисите се соочуваат со зголемени потешкотии во плаќањето поради зголемените предупредувања на САД за секундарни санкции против банките кои работат во клучните партнерски земји на Русија. Компаниите добиваат се помалку валута и имаат потешкотии да ја добијат од земји како Кина и Турција.
Владата одговори со олеснување на мерките кои ја поддржуваат руската валута. Задолжителната размена на заработката од извозот е намалена на 25% од 50% според налогот објавен минатиот петок. Претходно го намали условот за репатријација на профит на 60 отсто во јуни, а потоа на 40 отсто еден месец подоцна.
„Владата е принудена да им олесни на извозниците“, коментира Наталија Милчакова, аналитичар во „Freedom Finance Global“ во Казахстан.
Продажбата на валути од најголемите руски извозници падна за 30 отсто во септември во однос на претходниот месец, бидејќи голем дел од трансакциите беа направени во рубљи, покажаа податоците на руската централна банка.
Рубљата потона на 120 за долар веднаш по почетокот на војната, но потоа брзо закрепна откако централната банка повеќе од двојно ја зголеми основната стапка на 20% во итен потег пред да започне постепен пад.
Сега повторно на 19%, стапката би можела да се врати на највисоките нивоа на следниот состанок за политиката на регулаторот следната недела. Централната банка се обидува да ја олади прегреаната воена економија на Русија и да ја ограничи забрзаната инфлација, која е повеќе од двојно поголема од целта од 4%.
„Банката ќе мора да користи монетарна политика за да ја надомести индиректната штета од слабата рубља во форма на висока инфлација“, коментира Милчакова.
Што се однесува до буџетот, послабите девизни курсеви секогаш се од корист, коментира Вјугин од своја страна.
