Американскиот претседател Џозеф Бајден денеска изјави дека е време сопствениците на пристаништата да го решат штрајкот на 45.000 пристанишни работници ширум истокот на земјата, бидејќи тоа ја блокира испораката на стоки во САД.
Работниците на пристаништата од Мејн до Тексас од вчера штрајкуваат поради, како што велат, недоволните плати и стравот од губење на работни места по планираната автоматизација на пристаништата.
„Конзорциумот е во основа шест сопственици кои ги контролираа сите пристаништа од целото источно атлантско крајбрежје до Мексиканскиот залив и тие направија неверојатни профити од пандемијата, повеќе од 800 проценти од профитот, а тие заработуваат десетици милиони долари. “, рече Бајден, како што пренесе Ројтерс.
Тој додаде дека последното нешто што им е потребно е да профитираат од сегашната ситуација.
„Време е тие да седнат и да го прекинат овој штрајк“, рече Бајден.
Пристанишните работници во 36 пристаништа во источниот дел на САД вчера го започнаа првиот штрајк во последните децении, што може да ги загрози синџирите на снабдување, да предизвика недостиг и, доколку трае подолго, да ги зголеми цените на суровините, објави АП.
Околу 45.000 работници, членови на Меѓународната асоцијација на бродари, рано утринава почнаа со прекин на работата, откако на полноќ истече постоечкиот договор меѓу нив и пристаништето.
По почетокот на штрајкот, речиси половина од целата трговија што доаѓа во САД е запрена, а податоците од царината покажуваат дека, меѓу другото, блокирана е и испораката на важни медицински помагала и скапи лекови, наведува Си-Ен-Ен.
